UEFA Çempionlar Liqasının qalibi müəyyənləşib.

QalaNews.com xəbər verir ki, həlledici görüşdə Arsenal ilə üz-üzə gələn PSJ qələbə qazanıb.

Macarıstanın paytaxtı Budapeştdəki Puşkaş Arenada baş tutan matçın əsas və əlavə vaxtında qalib müəyyənləşməyib - 1:1.

Hesabı 6-cı dəqiqədə topçuların heyətində Kay Haverst açıb. Matçın 65-ci dəqiqəsində Usman Dembele penalti zərbəsindən hesabı bərabərləşdirib.

Hər biri 15 dəqiqədən ibarət əlavə iki hissədə qalib müəyyənləşmədiyindən penaltilər seriyasına ehtiyac duyulub.

Burada daha dəqiq oynayan parislilər (4:3) ardıcıl ikinci dəfə qitənin ən nüfuzlu klub turnirinin qalibi olublar.

Qeyd edək ki, PSJ tarixində 3-cü dəfə UEFA Çempionlar Liqasının finalında iştirak edib. 2020-ci ildə həlledici qarşılaşmada Almaniyanın Bavariya komandasına uduzan (0:1) Fransa təmsilçisi ötən mövsüm İnteri (İtaliya) 5:0 hesabı ilə məğlub edərək turnirin qalibi adını qazanıb.

Sonuncu dəfə 2006-cı ildə finala yüksəlmiş Arsenal isə bu titulu ilk dəfə qazanmaq üçün mübarizə aparıb. Premyer Liqa təmsilçisi 20 il öncəki matçda Barselonaya (İspaniya) 1:2 hesabı ilə məğlub olub.

PSJ və Arsenal UEFA turnirlərində ümumilikdə 8 dəfə üz-üzə gəliblər.