Loading alternative title

ÖLKƏ

  • alternative title

    Təhsil Nazirliyindən dərslikdə erməni bayrağının rənglərinin olması iddiası ilə bağlı AÇIQLAMA

    Təhsil Nazirliyi dərslikdə erməni bayrağının rənglərinin olması iddiasına münasibət bildirib. Nazirliyin açıqlamasında deyilir ki, sosial şəbəkələrdə yayılmış erməni bayrağının rənglərinin əks olunduğu iddia edilən kitabların heç biri dərslik deyil və Təhsil Nazirliyi tərəfindən nəşr edilməyib. “Təhsil Nazirliyinin məktəblər üçün nəşr etdirdiyi bütün dərsliklərlə www.trims.edu.az saytının “Qrifli dərsliklər” bölməsində tanış olmaq mümkündür. Təhsil sahəsi və dərsliklər ictimaiyyətin daim maraq dairəsində olduğundan bəzi maraqlı şəxslər vaxtaşırı olaraq belə köhnəlmiş və ya uydurma məlumatları yaymaqla insanlar arasında süni ajiotaj və narazılıq yaratmağa cəhd edirlər. Çünki bir çox insanlar yayılan xəbəri araşdırmadan onu mütləq həqiqət kimi qəbul edirlər. Təhsil Nazirliyi geniş ictimaiyyətdən dərsliklər barədə yayılan xəbərlərin \ doğruluğunu www.trims.edu.az saytı vasitəsilə yoxlamağı xahiş edir”. “Eyni zamanda bildiririk ki, istənilən kitab nəşriyyat məhsulu hesab edilir və onun hazırlanması zamanı mövcud qanunvericiliyə əsasən, nəşr üçün nəzərdə tutulmuş materialların senzurasına yol verilmir. Hər bir hüquqi və ya fiziki şəxs nəşriyyat məhsulunun sifarişçisi ola bilər”, - deyə məlumatda qeyd edilir.

    Ətraflı   16:07     21-Sep-2020     1094
  • alternative title

    AZAL-dan “AZAL-Miles” bonus proqramının üzvlərinə MÜRACİƏT

    Azal “AZAL-Miles” bonus proqramının üzvlərinə müraciət edib. Bu barədə “Facebook” səhifəsində yazılıb. Bildirilib ki, COVID-19 pandemiyası ilə bağlı müntəzəm uçuşların dayandırılması səbəbindən bütün bonus ballarının etibarlılıq müddəti avtomatik olaraq 31 dekabr 2020-ci ilədək uzadılıb. Müntəzəm uçuşların yaxın zamanda bərpa olunacağı ümid edilir, lakin hər hansı dəyişikliklər olarsa, əvvəlcədən xəbər veriləcək.

    Ətraflı   15:46     21-Sep-2020     960
  • alternative title

    Bakıda fəhlə faciəli şəkildə öldü

    Sentyabrın 19-da saat 20 radələrində Yasamal rayonu ərazisində Polad Eynullayevin üzərinə dəmir boru düşməsi nəticəsində aldığı xəsarətlərdən ölməsi barədə rayon prokurorluğuna məlumat daxil olub. Bu barədə Yasamal Rayon Prokurorluğu məlumat yayıb. Məlumat əsasında prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilib, digər prosessual hərəkətlər yerinə yetirilib. Aparılmış araşdırmalarla Yasamal rayonu ərazisində yerləşən “Royal Park” yaşayış massivinin “A” blokunda tikinti işlərinin aparıldığı evdə fəhlə işləyən Polad Eynullayevin sıvay-qazma işləri apararkən dəmir borunun üzərinə düşməsi nəticəsində aldığı xəsarətlərdən ölməsi müəyyən edilib. Hazırda faktla bağlı Yasamal rayon prokurorluğunda araşdırma aparılır.

    Ətraflı   15:44     21-Sep-2020     1298
  • alternative title

    Ehtiyatda olan zabitin əlilliyə görə müavinəti kəsilib? - AÇIQLAMA

    Ehtiyatda olan zabitin əlillik dərəcəsinə görə aldığı pensiya kəsilib. Bu barədə Süleymanov Fərrux David oğlu özü məlumat verib. Ehtiyatda olan zabitin sözlərinə görə, o 2008-ci ildən ordudan tərxis olunub: “Mən vəzifə başında yaralandığım üçün ordu sıralarından tərxis olunmuşam və ikinci qrup əlillik dərəcəsi almışam. Dövlət Tibbi-Sosial Ekspertiza və Reabilitasiya Xidməti tərəfindən mənim ikinci qrup əlillik şəhadətnaməm ləğv edilib. Hər il bir dəfə əlillik dərəcəsini təsdiqlətmək üçün həkim komissiyasından keçirdim. 2014-cü ildə isə növbəti dəfə həkim komissiyasından keçdikdə artıq mənə müddətsiz əlillik dərəcəsi verilib. E-sosial.az saytından qeydiyyatdan keçdim. Şəxsi kabinetimdə isə sistemdə əlillik dərəcəmin ( müddətsiz olmağına baxmayaraq) bir il müddətinə işləndiyini gördüm. Həmçinin hərbi həkim komissiyasının mənə verdiyi diaqnoz da sistemə yanlış köçürülüb. Sistemdə mənim müddətsiz əlillik dərəcəmin və diaqnozumun səhv işlənməsində mənim və ailəmin günahı var? Mən bu səhvə görə haqsızlıqla qarşı-qarşıya qalmışam. Bunu mənə və ailəmə qarşı haqsızlıq kimi qəbul edirəm. Sizdən xahiş edirəm, mənim müraciətimi qəbul edib, bu haqsızlığın aradan qaldırılmasına kömək edəsiniz”. Məsələ ilə bağlı Dövlət Tibbi-Sosial Ekspertiza və Reabilitasiya Xidməti bildirilib ki, Süleymanov Fərrux David oğluna (569FWOZ) Əlillik Altsistemində (2.2. 2.2.7. Həzm orqanlarının residivli gedişli ağır, xroniki xəstəlikləri, ümumi qidalanmanın nəzərə çarpan dərəcədə zəifləməsi ilə meyarına əsasən) bir il müddətinə 27.05.2014-27.05.2015 tarixlərində ikinci dərəcə əlillik təyin edilib. Şəxsin əlillik müddəti kağız daşıyıcılarda müddətsiz qeyd edilməsinə baxmayaraq, elektron bazada bir il müddəti göstərilib. Fərrux Süleymanova DSMF-dən əlilliyə görə sosial müavinəti barədə müvafiq arayış əldə edərək, rayon üzrə Tibbi-Sosial Ekspert Komissiyasına təqdim etməsi tövsiyə edilir. Həmin sənədlər üzrə müvafiq araşdırmalardan sonra vətəndaşın əlillik dərəcəsi ilə bağlı qərar veriləcək.

    Ətraflı   15:41     21-Sep-2020     241
  • alternative title

    14 şəhid ailəsi və Qarabağ müharibəsi əlili mənzillərlə təmin olundu - FOTO

    Əmək və Əhalinin Sosial Müdafiəsi Nazirliyi tərəfindən Naftalanda 6, Ağstafa rayonunda 6, Lerik rayonunda isə 2 yeni inşa etdirilmiş fərdi yaşayış evi şəhid ailələrinə və Qarabağ müharibəsi əlillərinə təqdim edilib. Naftalanda keçirilən evlərin təqdim edilməsi tədbirində nazirliyin tabeliyindəki Sosial Xidmətlər Agentliyinin sədr müavini Pərviz Səfərov, Naftalan Şəhər İcra Hakimiyyəti başçısının müavini Arzu Məmmədov və digərləri iştirak edib. Tədbirdə Prezident İlham Əliyevin həssas əhali qruplarına xüsusi qayğısından bəhs edilib. Bildirilib ki, sosial müdafiə proqramlarından biri olan şəhid ailələrinin və Qarabağ müharibəsi əlillərinin mənzillə təminatı proqramı ildən-ilə genişləndirilir. Şəhid ailələrinə və Qarabağ müharibəsi əlillərinə 2018-ci ildə nəzərdə tutulduğundan üç dəfə çox olmaqla 626, ötən il 934 mənzil və fərdi ev verilib. Dövlət başçısının tapşırığına əsasən 2020-ci ildə şəhid ailələrinə və müharibə əlillərinə rekord sayda - azı 1500 mənzil və fərdi ev verilməsi işləri aparılır. Bu gün Naftalan şəhərində, Ağstafa və Lerik rayonlarında təqdim edilən fərdi evlər də daxil olmaqla, onlardan artıq 598 mənzil və fərdi ev (o cümlədən 554 mənzil, 44 fərdi ev) verilib. Qalan evlər də ilin sonunadək veriləcək. Qeyd olunub ki, ümumilikdə ötən dövrdə şəhid ailələrinə və ölkəmizin ərazi bütövlüyü, müstəqilliyi və konstitusiya quruluşunun müdafiəsi ilə əlaqədar əlilliyi olan şəxslərə 8186 mənzil və fərdi ev təqdim edilib. Yeni fərdi yaşayış evi ilə təmin edilən şəhid ailələrinin üzvləri və Qarabağ müharibəsi əlilləri onların rifahına göstərilən yüksək qayğıya, bu gün isə yeni fərdi yaşayış evləri ilə təmin olunduqlarına görə Prezident İlham Əliyevə minnətdarlıqlarını ifadə ediblər.

    Ətraflı   15:37     21-Sep-2020     1011
  • alternative title

    17 yeni salınmış yaşayış massivi qazla təmin olunub - FOTO

    Bu ilin yanvar-iyul aylarında ümumilikdə 328,9 kilometr uzunluğunda qaz kəmərləri əsaslı təmir edilib. Bu barədə “Azəriqaz” İstehsalat Birliyindən (İB) məlumat verilib. Bildirilib ki, Bakı Regional Qaz İstismar Departamenti, regional qaz istismar idarələri və Sumqayıt qaz istismar sahəsi tərəfindən isə daxili imkanlar hesabına 2020-ci ilin yanvar-avqust ayları ərzində 290,89 km uzunluğunda (o cümlədən 262,52 km metal boru, 28,37 km polietilen boru) müxtəlif diametrli qaz xətləri təmir edilərək yenisi ilə əvəz edilib. Eyni zamanda 366 ədəd qaz tənzimləyici və 318 ədəd bağlayıcı armaturlar (siyirtmə və rəzələr) quraşdırılıb. Regionlar üzrə 17 yeni salınmış yaşayış massivinə, dörd yaşayış məntəqəsinə (o cümlədən avqust ayında 1 yaşayış massivi, 4 yaşayış məntəqəsi) təbii qazın verilməsi təmin edilib. Son illər respublika ərazisində kənd və qəsəbələrin, yeni yaşayış massivlərinin qazlaşdırılması, eləcə də yeni istehsal təyinatlı obyektlərin istismara verilməsi abonentlərin sayının və təbii qaza olan tələbatın artmasına səbəb olub. Belə ki, hazırda ümumi abonent sayı 2 milyon 300 minə yaxınlaşmaqdadır. Qeyd edək ki, “Azəriqaz” İB cari ildə qaz təsərrüfatı infrastrukturunun genişləndirilməsi işlərini uğurla davam etdirir. Belə ki, tərtib edilmiş tədbirlər proqramına uyğun olaraq nəzərdə tutulmuş işlərin icrası ilə əlaqədar ilk növbədə kənd və qəsəbələrin daşıyıcı qaz kəmərlərinin yenidənqurulması, kəmərlər üzərində quraşdırılmış istismar müddəti bitmiş avadanlıqların yeniləri ilə əvəz edilməsi, sonrakı mərhələdə isə mövcud qaz paylayıcı şəbəkələrin, küçə və dalanların qaz xətlərinin yenidənqurulması, eləcə də hər bir istehlakçının mənzilinə qaz sayğaclarının quraşdırılması işləri aparılır.

    Ətraflı   15:32     21-Sep-2020     1143
  • alternative title

    Rusiyada toy edənlər səhvən azərbaycanlıların kabinetinə girdilər: Dava düşdü

    Rusiyanın Moskva şəhərində kafelərindən birində toy atışma və kütləvi dava ilə sona çatıb. 5-tv.ru xəbər verir ki, hadisə sentyabrın 20-də, axşam saatlarında baş verib. Məlum olub ki, toya gələn Tacikistan sakinlərindən ibarət sərxoş qrup səhvən Azərbaycan vətəndaşlarının istirahət etdiyi qonşu kafeyə giriblər. Kişilər arasında dava düşüb, onlar münaqişəni həll eləmək üçün küçəyə çıxıblar. Bu zaman tacikistanlıların toyda iştirak edən tanışları onlara köməyə gəliblər. Onlardan biri havaya travmatik silahla bir neçə dəfə atəş açıb. Zərər çəkən olmayıb. Hadisə nəticəsində hər iki tərəfdən ümumilikdə 20-52 yaş arası səkkiz nəfər nəzarətə götürülüb. Onlar bir-birinə qarşı ifadə verməkdən imtina ediblər. Faktla bağlı araşdırma davam edir.

    Ətraflı   15:27     21-Sep-2020     1310
  • alternative title

    Azərbaycanda azyaşlının çılpaq şəkillərini yayan şəxs həbs edildi

    Baş Prokurorluq Neftçala rayonunda 18 yaşına çatmamış qızın qeyri-etik fotolarını çəkərək yayan şəxsin cinayət məsuliyyətinə cəlb edilməsi ilə bağlı məlumat yayıb. Qurumdan bildirilib ki, Neftçala rayon sakini Aytən Əliyevanın (ad şərtidir) eyni məzmunlu müraciəti üzrə Neftçala Rayon Prokurorluğunda araşdırma aparılıb: “Aparılmış araşdırmalarla Əyyar Əzizovun qeyd edilən cinayət hadisələrini törətməsinə əsaslı şübhələr müəyyən edilib. Faktla bağlı Neftçala Rayon Prokurorluğu tərəfindən Cinayət Məcəlləsinin müvafiq maddələri ilə cinayət işi başlanıb. Prokurorluq və polis əməkdaşlarının həyata keçirdikləri istintaq-əməliyyat tədbirləri nəticəsində Əyyar Əzizov müəyyən edilməklə təqsirləndirilən şəxs qismində cəlb olunub və barəsində məhkəmənin qərarı ilə həbs qətimkan tədbiri seçilib”. Hazırda iş üzrə zəruri istintaq hərəkətləri davam etdirilir.

    Ətraflı   15:23     21-Sep-2020     1208
  • alternative title

    Hər deputatın 3-5 könüllüsü ola bilər

    Milli Məclisin payız sessiyasında “Deputat könüllüləri” layihəsinin icrası, Parlament könüllülərinin yaradılması istiqamətində tədbirlər, habelə şəhid ailələri, müharibə veteranları, Azərbaycan Gənc Müəllimlər Asossiasiyasının üzvləri, əsgərlər və idmançılarla bir sıra görüşlər planlaşdırılır. Parlamentin Mətbuat və ictimaiyyətlə əlaqələr şöbəsinin məlumatına əsasən, bunu Milli Məclisin Gənclər və idman komitəsinin iclasında komitə sədri Adil Əliyev deyib. O bildirib ki, komitə üzvləri, eyni zamanda, işğal altında olan ərazilərimizdə vəziyyətin beynəlxalq ictimaiyyətin diqqətinə çatdırılması istiqamətində aktiv fəaliyyət göstərəcəklər. Komitə sədri qeyd edib ki, millət vəkillərinin yerlərdə könüllülərinin olması, hər bir deputatın ən az 3-5 könüllünü seçməsi çox müsbət hal olardı. “Ümumilikdə, 125 deputatın bir yerdə mindən artıq könüllüsünün olması, onların da dövlətin, dövlətçiliyin inkişafında, möhkəmləndirilməsində fəaliyyətə cəlb edilməsi çox vacibdir”, - deyə A.Əliyev məlumat verib. İclasda komitənin 2020-ci il yaz və növbədənkənar sessiyalarında fəaliyyəti məqbul sayılıb, payız sessiyasının iş planı təsdiqlənib.

    Ətraflı   15:21     21-Sep-2020     1047
  • alternative title

    Bakı mühüm beynəlxalq tədbirə ev sahibliyi edəcək

    Bakı şəhəri “Avropa Kəllə-Üz-Çənə Cərrahları Cəmiyyəti”nin 2023-cü ildə keçiriləcək III Regional Konfransına ev sahibliyi edəcək. Bu barədə qərar sentyabrın 17-də “Avropa Kəllə-Üz-Çənə Cərrahları Cəmiyyəti”nin 42 ölkədən olan yüksək səviyyəli nümayəndələrinin iştirakı ilə onlayn keçirilən səsvermə nəticəsində qəbul olunub. Həmçinin 2017-ci ildə “Azərbaycan Ağız və Üz-Çənə Cərrahları Cəmiyyəti”nin sədri kimi fəaliyyətə başlayan Çingiz Rəhimov təşkilatın Şərqi Avropa üzrə regional nümayəndəsi seçilib. Bakının namizədliyinin elan edildiyi ilk gündən Dövlət Turizm Agentliyi, Azərbaycan Turizm Bürosu və Azərbaycan Konqreslər Bürosu tərəfindən aparılan uğurlu təbliğat işi, həmçinin paytaxtın turizm və təşkilatçılıq imkanlarının peşəkar şəkildə təqdim edilməsi konfransın Azərbaycanda keçirilməsi hüququnun əldə edilməsi ilə nəticələnib. Azərbaycan Konqreslər Bürosu tərəfindən irimiqyaslı tanıtım, təbliğat və marketinq kampaniyasının aparılması, Professor Çingiz Rəhimovun göstərdiyi təşəbbüsün hərtərəfli dəstəklənməsi 1000-dən çox xarici iştirakçısı olması gözlənilən konfransın ölkəmizə cəlb edilməsinə öz töhfəsini verib. İşgüzar turizmin inkişafı üzrə bu nailiyyətin əldə edilməsinə Azərbaycan Respublikası Nazirlər Kabineti, Xarici İşlər Nazirliyi, eləcə də Səhiyyə Nazirliyi tərəfindən böyük dəstək göstərilib. “Bu cür irimiqyaslı beynəlxalq tədbirlər nəinki ölkəmizin və onun işgüzar turizm imkanlarının tanıdılmasına xidmət edir, eyni zamanda müxtəlif sahələrin inkişafına da öz töhfəsini verir”, - deyə Azərbaycan Konqreslər Bürosunun direktoru Sevda Əliyeva bildirib. 1970-ci ildə əsası qoyulmuş Avropa, eləcə də dünyanın bir sıra başqa ölkələrində yüksək nüfuza malik olan “Avropa Kəllə-Üz-Çənə Cərrahları Cəmiyyəti” kəllə-üz-çənə cərrahiyyəsində müasir üsulların tətbiq olunması üzrə ixtisaslaşaraq sözügedən cərrahiyyə növü ilə bağlı yenilikləri çatdırmaq üçün hər iki ildən bir dünyanın müxtəlif ölkələrində beynəlxalq səviyyəli konfranslar keçirərək üzvlərini bir araya toplayır. Xatırladaq ki, Azərbaycan Turizm Bürosunun tabeliyində fəaliyyət göstərən Azərbaycan Konqreslər Bürosunun əsas məqsədi ölkəmizin işgüzar turizm imkanlarını tanıtmaqla irimiqyaslı beynəlxalq səviyyəli tədbirlərin Azərbaycana cəlb edilməsinə nail olmaq, ölkənin işgüzar turizm nüfuzunu gücləndirməkdir.

    Ətraflı   15:11     21-Sep-2020     1214
  • alternative title

    Sabahın havası: Yağış, şimşək, dolu

    Azərbaycanda sabaha gözlənilən hava şəraiti açıqlanıb. Milli Hidrometeorologiya Xidmətinin verdiyi məlumata görə, sentyabrın 22-də Bakıda və Abşeron yarımadasında havanın dəyişkən buludlu olacağı, arabir tutulacağı, əsasən yağmursuz keçəcəyi, səhər bəzi yerlərdə zəif duman olacağı gözlənilir. Cənub-şərq küləyi əsəcək. Havanın temperaturu Bakıda və Abşeron yarımadasında gecə 18-20, gündüz 23-25 dərəcə isti olacaq. Atmosfer təzyiqi normadan yüksək 766 mm civə sütunu, nisbi rütubət gecə 60-70, gündüz 40-45 faiz təşkil edəcək. Sentyabrın 22-də Azərbaycanın rayonlarında havanın əsasən yağmursuz keçəcəyi, lakin bəzi dağlıq və dağətəyi rayonlarda şimşək çaxacağı, arabir yağış yağacağı, dolu düşəcəyi ehtimalı var. Şərq küləyi əsəcək. Havanın temperaturu gecə 16-20, gündüz 23-28, dağlarda gecə 6-11, gündüz 13-17 dərəcə isti olacaq. Tibbi-meteoroloji proqnoza gəlincə, sentyabrın 22-23-də Abşeron yarımadasında meteoroloji amillərin zəif və mülayim tərəddüdü gözlənilir ki, bu da meteohəssas insanlar üçün əsasən əlverişlidir.

    Ətraflı   15:04     21-Sep-2020     925
  • alternative title

    Özünüməşğulluq proqramı gələn il 15 000 ailəni əhatə edəcək

    2018-ci ildə 7300-ə yaxın, 2019-cu ildə 10 000-dən çox ailənin cəlb edildiyi özünüməşğulluq proqramı əsasında bu il 12 000 ailənin kiçik müəssisələrinin yaradılması işləri aparılır. Gələn il isə proqram 15 000 ailəni əhatə edəcək. Ümumilikdə növbəti ildən özünüməşğulluq proqramı illik 15 000 ailənin kiçik biznesə çıxışına imkan verəcək. Bu da o deməkdir ki, ailə üzvlərinin sayı ilə hesabladıqda proqram illik orta hesabla 60 000 nəfərin rifahına dəstək olacaq. Proqrama cəlb edilənlərin böyük hissəsi əlilliyi olan şəxslər, şəhid ailələrinin üzvləri, məcburi köçkünlər, müharibə veteranları, aztəminatlı, habelə əsasən çoxuşaqlı ailələrin üzvləri və başqalarıdır. Dünya Bankı, BMT İnkişaf Proqramı, Heydər Əliyev Fondu, yerli banklar, habelə dövlət qurumlarından KOBİA, ABAD, Qida Təhlükəsizliyi Agentliyi, Kənd Təsərrüfatı Nazirliyi də bu proqramın genişləndirilməsi və dəstəklənməsi işlərinə cəlb olunub.

    Ətraflı   15:02     21-Sep-2020     1220
  • alternative title

    Bakıda elektrovozla vurularaq ölən şəxslə bağlı cinayət işi başladı

    Sentyabrın 19-da Qaradağ rayonu, Sahil qəsəbəsi ərazisində Maarif Şükürovu elektrovoz vurub, nəticəsində o, aldığı xəsarətlərdən vəfat edib. Bu barədə Qaradağ Rayon Prokurorluğundan məlumat verilib. Bildirilib ki, dərhal prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilib, digər prosessual hərəkətlər yerinə yetirilib. Aparılmış araşdırmalarla piyada Maarif Şükürovun Səngəçal-Qaradağ dəmir yolu xəttinin Sahil qəsəbəsi ərazisindən keçən hissəsində hərəkətdə olarkən elektrovozla vurularaq aldığı xəsarətlərdən ölməsi müəyyən edilib. ​Faktla bağlı Qaradağ Rayon Prokurorluğunda Cinayət Məcəlləsinin 262.2-ci (yerinə yetirdiyi işlə və ya tutduğu vəzifə ilə əlaqədar dəmir yolu, su və ya hava nəqliyyatının hərəkət təhlükəsizliyi və istismarı qaydalarına riayət etməyə borclu olan şəxs tərəfindən həmin qaydaların pozulması, ehtiyatsızlıqdan zərərçəkmiş şəxsin səbəb olduqda) maddəsi ilə cinayət işi başlanıb. Hazırda cinayət işi üzrə zəruri istintaq tədbirləri davam etdirilir.

    Ətraflı   15:00     21-Sep-2020     1335
  • alternative title

    Azərbaycanda pensiya ilə bağlı YENİLİK: Təhsil dövrü staj sayılacaq - RƏSMİ

    “Azərbaycanda artıq ali təhsil dövrü ümumi pensiya stajına daxil ediləcək”. Bunu Əmək və Əhalinin Sosial Müdafiəsi Nazirliyinin “Facebook” səhifəsində “Sosial Saat” verilişi zamanı Dövlət Sosial Müdafiə Fondunun əməkdaşı Ayxan Məcidov bildirib. A.Məcidov qeyd edib ki, Azərbaycanda bundan sonra kişilərin pensiya yaşının artırılması nəzərdə tutulmur: “Hazırda yaşa görə əmək pensiyasının təyin edilməsi üçün kişilər üçün yaş həddi 65, qadınlar üçün 62 yaşdır. Kişilərin pensiya yaşı ilə bağlı artım olmayacaq. Artıq 65 yaşı olan kişilər davamlı olaraq, pensiyaya çıxma imkanı əldə edə biləcəklər”. “30 iyun 2021-ci ilə kimi qadınlar üçün pensiya çıxma yaşı 62 olacaq. Ondan sonra isə pensiya üçün yaş həddi altı ay artırılacaq, - deyə DSMF rəsmisi qeyd edib.

    Ətraflı   14:58     21-Sep-2020     1248
  • alternative title

    “Funda” tibb mərkəzində əmək müqaviləsi olmadan işə götürülmə faktı aşkar olunub

    İqtisadiyyat Nazirliyi yanında Dövlət Vergi Xidməti “İLLAC” MMC-yə məxsus Nərimanov rayonu İsmayıl Hidayətzadə küçəsi, 45 ünvanında yerləşən “Funda” tibb mərkəzində vergi nəzarəti tədbirləri həyata keçirib. Nəzarət tədbirləri zamanı nağd pul hesablaşmalarının aparılması qaydalarına riayət olunması, işçilərin hüquqi qüvvəyə minmiş əmək müqaviləsi əsasında işlərin (xidmətlərin) yerinə yetirilməsinə cəlb edilməsi vəziyyəti yoxlanılıb. “Funda” tibb mərkəzinin rəhbərliyi - direktor Hümbətov Asim Yusif oğlu və həkim Hümbətova Lamiyə Yusif qızı mühasibatlıq və pul sənədlərinin təqdim edilməsi ilə bağlı vergi xidməti əməkdaşlarının qanuni tələblərinə əməl etməyib, operativ nəzarət prosesinin gedişatına maneçilik törədiblər. Vergi nəzarəti tədbirləri zamanı nağd pul hesablaşmalarının aparılması qaydalarına riayət olunmadığı, o cümlədən göstərilmiş tibbi xidmətə görə müştəri tərəfindən ödənilmiş nağd pul vəsaitinin dövriyyədən yayındırılması faktları aşkar edilərək müvafiq akt tərtib edilib. Bundan başqa, 27 nəfər tibb işçisinin əmək müqaviləsi və ya xidməti müqavilə bağlamadan işlərin görülməsinə (xidmətlərin göstərilməsinə) cəlb edildiyi aşkar olunub. Vergi orqanı əməkdaşları tibb mərkəzinin işçiləri ilə sorğu apararkən mərkəzin rəhbərliyi nəzarət prosesinə maneçilik törədərək sorğuya müdaxilələr edib, əmək müqaviləsi olmayan 13 heyət üzvünün (onların şəxsiyyətləri müəyyən edilib) izahat verməkdən yayındırılmasına, onların tibb mərkəzindən müxtəlif yollarla kənarlaşdırılmasına şərait yaradıb. “Funda” MMC-nin rəhbərliyi qanunvericiliyin tələblərini kobud şəkildə pozaraq zəruri sənədlərin və məlumatların vergi xidməti əməkdaşlarına vaxtında təqdim edilməsini təmin etməyib, onların fəaliyyətinə ciddi maneələr yaradıb. Vergidən yayınma faktlarının gizlədilməsinə yönəlmiş hərəkətlər və aşkar olunan nöqsanlar Dövlət Vergi Xidmətinin əməkdaşları tərəfindən akt və protokollarla rəsmiləşdirilib. Nəzarət tədbirlərinin həyata keçirilməsinə maneçilik törədilməsi faktı üzrə materiallar müvafiq hüquqi qiymət verilməsi üçün Nərimanov Rayon Məhkəməsinə göndərilib. Araşdırmalar davam edir. İqtisadiyyat Nazirliyi yanında Dövlət Vergi Xidməti bir daha vergi ödəyicilərini qanunvericiliyin tələblərinə ciddi şəkildə əməl etməyə, həmçinin operativ nəzarət tədbirləri zamanı vergi əməkdaşlarının iş prosesinə süni maneələr törətməməyə çağırır və bildirir ki, bu cür halların qarşısının alınması və təqsirkar şəxslərin məsuliyyətə cəlb olunması təmin ediləcək.

    Ətraflı   14:55     21-Sep-2020     1397
  • alternative title

    Bakıda satıcıya qarşı soyğunçuluq edən şəxs tutuldu - FOTO

    Binəqədi rayonu A.Gəraybəyli küçəsində yerləşən ərzaq mağazasında soyğunçuluq hadisəsi baş verib. Bununla bağlı Daxili işlər Nazirliyi məlumat yayıb. Həmin obyektdə satıcı işləyən qadın polisə müraciət edib ki, naməlum şəxs mağazada soyuducunun üzərində olan ona məxsus 220 manat pulu götürərək qaçmaq istəyib. Satıcı bunu gördükdə həmin şəxs onu itələyərək, oradan uzaqlaşıb. Binəqədi Rayon Polis İdarəsinin 5-ci Polis Bölməsi və Post Patrul Xidməti Bölüyü əməkdaşları tərəfindən həyata keçirilən tədbirlərlə qeyd edilən hadisəni törətməkdə şübhəli bilinən paytaxt sakini, əvvəllər dəfələrlə məhkum olunmuş Anar Cəfərov tutulub. Onun üzərində şəxsi axtarış aparılan zaman soyğunçuluq yolu ilə əldə etdiyi pul vəsaitləri maddi sübut kimi aşkar olunub. Faktla bağlı saxlanılan şəxs barəsində 5-ci Polis Bölməsində toplanan materiallar Binəqədi RPİ-nin İstintaq Şöbəsinə göndərilib, araşdırmalar davam etdirilir. Bu şəxsin paytaxt ərazisində digər analoji cinayətlər törətdiyi istisna olunmur. Onun əməllərindən zərərçəkən başqa vətəndaşlar varsa, bu barədə ərazi üzrə polis idarə, şöbə və bölmələrinə, habelə DİN-in “102” Zəng Mərkəzinə məlumat verə bilərlər.

    Ətraflı   14:41     21-Sep-2020     1115
  • alternative title

    Dağlıq Qarabağın azərbaycanlı icması: “Beynəlxalq ictimaiyyəti Ermənistana təzyiq göstərməyə çağırırıq”

    Azərbaycan Respublikası Dağlıq Qarabağ bölgəsinin azərbaycanlı icması 21 sentyabr - Beynəlxalq Sülh Günü ilə bağlı bəyanat yayıb. İcmadan verilən məlumata görə, bəyanatda deyilir: “Bu gün BMT tərəfindən 1981-ci ildə dünyada sülh və birlik ideallarını gücləndirmək üçün təsis edilmiş Beynəlxalq Sülh Günü kimi qeyd olunur. Təəssüflər olsun ki, COVID-19 pandemiyası səbəbindən artan qlobal təlatümlər fonunda, bu dəyərləri gücləndirmək əvəzinə, onsuz da zəifləmiş beynəlxalq təhlükəsizliyi təhdid altına alan sülh defisitinin şahidi oluruq. BMT Baş katibinin qlobal atəşkəs çağırışı etdiyi, dünyanın dörd bir tərəfində müharibə edən tərəfləri vahid düşmənə - koronavirusa qarşı birlikdə mübarizə aparmağa, silahlarını yerə qoymağa səslədiyi bir dövrdə Ermənistan bu çağırışa məhəl qoymadan öz işğalçı planlarını həyata keçirmək cəhdlərini davam etdirir. 12 iyul 2020-ci ildə pandemiya dövründə Ermənistan həyati əhəmiyyətli kommunikasiya xətlərinin keçdiyi yeni Azərbaycan ərazilərini ələ keçirmək üçün hücuma başladı. Bu, son 30 ildə Ermənistanın Azərbaycana qarşı bitməyən təcavüzünün davamıdır. Məhz bu təcavüz nəticəsində Azərbaycan ərazisinin beşdə biri Ermənistanın işğalı altındadır və bir milyona yaxın yurdlarından didərgin salınmış azərbaycanlı əhali öz əzəli torpaqlarına, ata-baba yurdlarına geri dönə bilmirlər. Təcavüzkar Ermənistan işğal etdiyi Azərbaycan ərazilərində möhkəmlənmək üçün, bu ərazilərdə qanunsuz yaşayış məskənləri salır. Hətta, bu yaxınlarda Beyrut limanında baş verən dəhşətli partlayışdan belə öz mənfur əməlləri üçün sui-istifadə edərək, bir sıra erməni ailələrinin Livandan işğal olunmuş Azərbaycan ərazilərinə köçürülməsinə başlayıb. Bu cəhdlər beynəlxalq humanitar hüququn kobud şəkildə pozulmasıdır və çox ciddi müharibə cinayətləridir. Ermənistanın Baş nazirinin həyat yoldaşı Anna Hakopyan bir yandan riyakarcasına sülh çağırışları edərkən, digər tərəfdən işğal olunmuş Azərbaycan ərazilərində erməni qadınları üçün hərbi təlim keçirir. Buradan belə bir sual doğur: Ermənistanın “sülhsevər” Baş nazirinin “sülhsevər” xanımı başqa bir ölkənin ərazisində hərbi forma geyinərək, o ölkənin xalqına silah yönəldərək nəyə nail olmaq istəyir? Ermənistanın siyasi rəhbərliyinin riyakar yanaşmasından fərqli olaraq, Azərbaycanın Dağlıq Qarabağ bölgəsinin etnik təmizləməyə məruz qalmış azərbaycanlı əhalisi kimi, biz keçən illər ərzində Ermənistan-Azərbaycan münaqişəsinin sülh yolu ilə həll olunmasının tərəfdarı olduq. İcmamızın münaqişənin həlli üçün konstruktiv dialoq çağırışlarına, təəssüflər olsun ki, Ermənistan tərəfi hər zaman etnik nifrət, hiddət və inkarçılıqla qarşılıq verib. Sülh şəraitində birgəyaşayışın mümkünlüyünə inandığımızı bəyan edərək, işğalçı qüvvələrini Azərbaycan ərazilərindən geri çəkmək və bizim öz əzəli yurdumuza dönüşümüzə şərait yaratmaq məqsədilə beynəlxalq ictimaiyyəti Ermənistana təzyiq göstərməyə çağırırıq. Çağırışımızın həyata keçməsi, sülhsüz keçirdiyimiz “Sülh Günü”nün əsl mahiyyətini həyatımızda hiss etməyə bizə imkan verərdi”.

    Ətraflı   14:40     21-Sep-2020     218
  • alternative title

    Bakıda məktəbi qızıl və gümüş nişanla bitirən məzunların sayı açıqlandı

    Təhsil nazirinin müvafiq əmrinə əsasən, Bakı Şəhəri üzrə Təhsil İdarəsinin tabeliyindəki ümumi təhsil müəssisələrinin XI sinif məzunlarından 19-u qızıl, 7-si gümüş nişana layiq görülüb. İdarədən verilən məlumata görə, əmrdə ümumi təhsili xüsusi nailiyyətlərlə başa vuran məzunların adları və sayı açıqlanıb. Belə ki, ümumilikdə respublika üzrə ötən tədris ilində təhsil müəssisələrini bitirən məzunlardan 125-i qızıl, 76-sı isə gümüş nişanla təltif olunub. Qeyd edək ki, qızıl və gümüş nişana namizədlər Nazirlər Kabinetinin müvafiq qərarı ilə təsdiq olunmuş “Ümumi təhsili xüsusi nailiyyətlərlə başa vuran məzunların qızıl və ya gümüş nişanla təltif olunma Qaydası”na əsasən müəyyənləşdirilib.

    Ətraflı   14:36     21-Sep-2020     222
  • alternative title

    Sabirabadda qeysəriyyə yolu ilə doğulan uşaq öldü

    Sentyabrın 20-də, saat 03 radələrində Sabirabad rayonu, Qasımbəyli kənd sakini Aytac Quliyevanın yeni doğulmuş uşağının ölməsi barədə rayon prokurorluğuna məlumat daxil olub. Sabirabad Rayon Prokurorluğundan verilən məlumata görə, prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilib, digər prosessual hərəkətlər yerinə yetirilib. Aparılmış araşdırmalarla Aytac Quliyevanın sentyabrın 16-da saat 13 radələrində doğuş sancıları ilə daxil olduğu Sabirabad Rayon Mərkəzi Xəstəxanasında qeysəriyyə əməliyyatı yolu ilə oğlan uşağının dünyaya gəlməsi və qeyd edilən tarixdə yeni doğulmuş uşağın ölməsi müəyyən edilib. Hazırda fakt üzrə Sabirabad Rayon Prokurorluğunda araşdırma aparılır.

    Ətraflı   14:32     21-Sep-2020     1120
  • alternative title

    AQTA quşçuluq sahəsində fəaliyyət göstərən sahibkarlara xəbərdarlıq etdi

    Son zamanlar qida məhsullarının ticarəti ilə məşğul olan müəssisələrdə, topdan və pərakəndə satış obyektlərində, bazarlarda və yarmarkalarda Qida Təhlükəsizliyi Agentliyi tərəfindən aparılan dövlət baytarlıq nəzarəti tədbirləri zamanı bir sıra heyvan mənşəli məhsulların, o cümlədən ət, süd, yumurta, bal və emal yolu ilə onlardan alınan məhsulların dövlət baytarlıq nəzarətinə təqdim edilmədən satışının həyata keçirildiyi faktları aşkar edilməkdədir. Qeyd edək ki, heyvan mənşəli məhsulların baytarlıq-sanitariya ekspertizasından keçmədən satışı əhalinin zoonoz xəstəliklərə yoluxmasına zəmin yaradır. Belə ki, aparılan dövlət nəzarəti tədbirləri zamanı bəzi quşçuluq təsərrüfatlarının baytarlıq nəzarətindən yayınaraq, məhsullarını müxtəlif ticarət mərkəzlərinə və ictimai iaşə müəssisələrinə təqdim etməsi cəhdləri olur. Baytarlıq nəzarətindən keçmədən quş əti və məhsullarının istifadəsi zamanı insanların virus mənşəli quş qripi, nyukasl, bakterial mənşəli salmanelyoz, kompilobakterioz, yersinyoz, xlamidyoz, pasterilyoz, quş vəbası və s. xəstəliklərə yoluxması təhlükəsi vardır. Azərbaycan Respublikası Ümumdünya Heyvan Sağlamlığı Təşkilatının (OIE) üzvüdür. Bu təşkilat dünya üzrə baş verən zoonoz infeksiyalar haqqında 182 üzv ölkəyə gündəlik olaraq məlumatlar verir. Daxil olan məlumatlar əsasında ölkə ərazisini xaricdən keçə biləcək zoonoz, ekzotik və digər zoonoz xəstəliklərdən qorumaq məqsədilə Qida Təhlükəsizliyi Agentliyi tərəfindən bu notifikasiyalar əsasında Ukrayna, Rusiya, Qazaxıstan, Polşa, Almaniya, İtaliya, ABŞ və s. 20 ölkənin müxtəlif vilayətlərində baş verən quş qripi xəstəliyinə görə Rusiya və Bolqarıstanın müxtəlif vilayətlərində baş vermiş nyukasl xəstəliyinə görə diri quş, quş əti və məhsullarının ölkəyə idxalı dayandırılıb və təlimata uyğun prosedurlar həyata keçirildikdən sonra idxala icazə verilib. Əlavə olaraq cari ildə ölkəyə idxal olunan quş əti və məhsulları üzərində həyata keçirilən risk əsaslı nəzarət tədbirləri zamanı laborator müayinələr üçün nümunələr götürülüb və normativ texniki sənədlərin tələblərinə cavab verməyən Rusiya, Belarus, Ukrayna, Gürcüstan mənşəli 49,307 ton toyuq məhsulu məhv edilib, 30,964 ton toyuq məhsulu isə geri qaytarılıb. “Təəssüflə deməliyik ki, yerli quşçuluq müəssisələrində də aparılan monitorinqlər zamanı aşkar olunan norma və qayda pozuntuları bu sahədə vəziyyətin qənaətbəxş olmadığının gostəricisidir. Bəzi təsərrüfatlar nəinki özləri effektiv baytarlıq nəzarətini təşkil etmir, həmçinin dövlət baytarlıq nəzarətinin təmin edilməsinə də maneələr yaradılmasına cəhd edirlər. Agentlik tərəfindən bu müəssisələrdə nəzarət qaydasında həyata keçirilən fəaliyyət zamanı quş cəmdəklərinin ayaqqabı sənayesində dərilərin boyanması üçün istifadə edilən anilin boyası vasitəsilə sarı rəngə boyayaraq kənd toyuğu adı altında insanlara satılması, toyuğun çəkisini artırmaq məqsədilə cəmdəklərə 30-40 faiz su vurulması, istifadə müddəti keçmiş quş əti və məhsullarının, habelə yumurtanın istehsal tarixini dəyişərək yenidən satış şəbəkələrinə qaytarılması, müxtəlif xəstəliklərdən quşların kütləvi ölüm hallarının gizlədilməsi və s. kimi halların aşkar olunması bu müəssisələrə dövlət nəzarətinin vacibliyini bir daha zəruri edir. Aşkar edilmiş bu pozuntular ictimailəşdirilərək, geniş istehlakçı kütlələri məlumatlandırılmış və əhalinin ciddi və haqlı qınağı ilə qarşılanıb. Bildiririk ki, “Baytarlıq haqqında” Azərbaycan Respublikasının Qanununa əsasən, heyvan mənşəli məhsulların saxlanması və satışı ilə məşğul olan təşkilatlara yalnız baytarlıq (baytarlıq-sanitariya) ekspertizasından keçmiş, əhalinin sağlamlığı üçün təhlükəsizlik tələblərinə cavab verən və yoluxucu xəstəliklərə görə sağlam təsərrüfatlardan olan məhsulun qəbuluna, saxlanması və satışına yol verilir. Qida Təhlükəsizliyi Agentliyi bu sahədə fəaliyyət göstərən təsərrüfat subyektlərinə, ticarət və ictimai iaşə müəssisələrinin rəhbərlərinə ciddi şəkildə xəbərdarlıq edərək bildirir ki, dünyada yayılmaqda olan COVID-19 pandemiyası şəraitində bəzi işbazlar təsərrüfat subyektlərinin sahibləri ilə əlbir olaraq baytarlıq (baytarlıq-sanitariya) ekspertizasından keçməyən heyvan mənşəli məhsulların satışa təqdim edilməsi hallarına yol verirlər ki, bu da əhali arasında kəskin zoonoz infeksiyalarının yaranmasına səbəb ola biləcək qanun pozuntusudur. Qida Təhlükəsizliyi Agentliyi tərəfindən baytarlıq qanunvericiliyinin pozulmasına görə bu sahibkarlıq subyektlərinə qarşı qanunvericilikdə nəzərdə tutulmuş qaydada ən sərt tədbirlər görüləcək”, - məlumatda qeyd edilir.

    Ətraflı   14:27     21-Sep-2020     1017

Weather icon

humidity: 10%







Sosİal medİa

FACEBOOK-DA BİZƏ QOŞULUN

@qalanews

ŞAHİDİ OLDUĞUNUZ HADİSƏLƏRİ ÇƏKİB BİZİMLƏ PAYLAŞIN

BİZİ TWITTER-DƏ İZLƏYİN

@qalanews

BİZİ INSTAGRAM-DA İZLƏYİN

@qalanews

BİZİ YOUTUBE-DA İZLƏYİN

@qalanews

Hadİsə

  • alternative title 15:08     21-Sep-2020     321
  • alternative title 15:06     21-Sep-2020     1302
  • alternative title 14:53     21-Sep-2020     1261
  • alternative title 14:51     21-Sep-2020     1358
  • alternative title 14:47     21-Sep-2020     1126
image title here

Some title