Loading alternative title

İQTİSADİYYAT

  • alternative title

    Qurunt suları bu kəndin həyatını iflic edib

    Saatlı rayonu Minbaşılı kənd sakinləri illərdir ki, həyətlərinə qurunt sularınının yığılmasından əziyyət çəkir. Bu qurunt suları həm həyətyanı təsərrüfatı yararsız hala, həm də evlər qəzalı vəziyyətə salır. Kənddə xüsusilə payız-qış aylarında həyətlərə yığılan su pik həddə çatır. Suyun həyətyanı sahələrə yığılmasına səbəb isə kəndin içindən keçən su kanalının uzun illər qazılmamasıdır. Kənd sakini Xədicə Abbasova bildirir ki, həyətinə yığılan suyun səviyyəsi o qədər artıb ki, o artıq evdən çıxa bilmir. Qurunt suları səbəbindən həyətyanı sahələrindən də istifadə edə bilmirlər. Saatlı Rayon İcra Hakimiyyətinin Saatlı Şəhər İnzibati Ərazi Dairəsi Üzrə İcra Nümayəndəsi Nəsir Qədirov bildirir ki, sakinlərin üzləşdiyi problemdən məlumatlıdırlar və tez bir zamanda problemin həlli üçün çalışacaqlar. Problemin tezliklə öz həllini tapması labüddür. Çünki ilin dörd fəsli yığılıb qalan su, həm də müxtəlif xəstəliklərə səbəb ola bilər.

    Ətraflı   17:41     22-Feb-2020     486
  • alternative title

    Paytaxtda daha bir ünvanda piyada təhlükəsizliyinin səviyyəsi artırılıb

    Daha bir ünvanda piyada təhlükəsizliyinin səviyyəsi artırılıb. Bakı Nəqliyyat Agentliyindən AZƏRTAC-a bildirilib ki, çoxsaylı vətəndaş müraciətlərini nəzərə alaraq Bibiheybət yolu ilə Arif İsmayılov küçələrinin kəsişməsinin yaxınlığında nizamlanan piyada keçidi təşkil edilib. İşıqfor xüsusi sensorla təchiz edilib. Piyada sensorlu qurğuya toxunduqdan sonra işıqforu piyada keçidi rejiminə keçirə bilər. Bu kimi işıqforlar əsasən hərəkətin intensiv olduğu yollarda quraşdırılır. Belə ki, yolda piyada olmadığı halda işıqforun yalnız yaşıl işığı yanır ki, bu da hərəkətin fasiləsizliyinin təmin edilməsi baxımından vacib amildir.

    Ətraflı   15:36     22-Feb-2020     1299
  • alternative title

    Bakı Limanı İtaliyanın Trieste və Qenuya limanları ilə əməkdaşlıq edəcək

    Fevralın 21-də Romada keçirilmiş Azərbaycan-İtaliya biznes forumu çərçivəsində “Bakı Beynəlxalq Dəniz Ticarət Limanı” QSC ilə İtaliyanın Trieste və Qenuya limanları arasında anlaşma memorandumu imzalanıb. QSC-dən bildirilib ki, imzalanan sənədlərə əsasən limanlar Çinlə Avropa arasında mövcud olan ticarət dövriyyəsindən birgə bəhrələnəcək, innovasiyaların, qabaqcıl texnologiyaların, əməliyyat məsələləri üzrə biliklərin mübadiləsini həyata keçirəcəklər. İtaliyanın ən böyük limanı sayılan Trieste limanı, Çin, Uzaq Şərq, Sinqapur və Malayziya kimi ölkələr üçün Avropanın “giriş qapısı” sayılır. Hər ay buradan 400 qatarla Almaniya, Avstriya, Çexiya, Macarıstan və İsveçrəyə yüklər daşınır. Trieste limanının illik yük dövriyyəsi 70 milyon tona yaxındır. Həmçinin Qenuya limanı da İtaliyanın ən qədim limanlarından biridir və Avropa ilə Çin arasında ticarət əlaqələrində xüsusi əhəmiyyətə malikdir. Keçən il limanda 3 milyon TEU konteyner aşırılıb və 5 milyonadək sərnişinə xidmət göstərilib.

    Ətraflı   15:22     22-Feb-2020     1084
  • alternative title

    Gömrük-sərhəd keçid məntəqələrində nəzarət tədbirləri daha da gücləndirilib

    Gömrük-sərhəd keçid məntəqələrində nəzarət tədbirləri daha da gücləndirilib. Dövlət Gömrük Komitəsinin Mətbuat və İctimaiyyətlə Əlaqələr İdarəsindən bildirilib ki, son vaxtlar Çin Xalq Respublikasında aşkarlanan, dünyanın bir sıra ölkələri ilə yanaşı, qonşu İran İslam Respublikasında da müşahidə olunan koronavirus epidemiyasına qarşı həyata keçirilən qabaqlayıcı tədbirlər çərçivəsində ölkəmizin gömrük-sərhəd keçid məntəqələrində nəzarət tədbirləri daha da gücləndirilib. Belə ki, İrandan ölkə ərazisinə daxil olan şəxslərin bədən hərarəti ölkə sərhədini keçən anda, inzibati binaya daxil olmadan portativ termometrlərlə yoxlanılır. Bu məqsədlə gömrük-sərhəd keçid məntəqələri əlavə 20 ədəd portativ termometrlə təchiz olunub. Eyni zamanda, təcili tibbi yardım avtomobilləri birbaşa postların ərazisinə cəlb olunub və 24 saat növbəli rejimdə fəaliyyət göstərirlər. Bundan başqa, Səhiyyə Nazirliyi və Tibbi Ərazi Bölmələrini İdarəetmə Birliyinin (TƏBİB) əməkdaşları gömrük-keçid məntəqələrində həyata keçirilən profilaktik tədbirlərlə əyani şəkildə tanış olub və aşkar olunan riskli hallarda birgə fəaliyyətin koordinasiya edilməsi məsələləri müzakirə edilib.

    Ətraflı   14:54     22-Feb-2020     922
  • alternative title

    Ölkəyə 29,5 milyon dollarlıq humanitar və texniki yardım şəklində məhsullar gətirilib

    2019-cu ildə Azərbaycana 29,5 milyon dollarlıq humanitar və texniki yardım şəklində müxtəlif məhsullar daxil olub. Bu barədə Dövlət Statiska Komitəsindən verilən məlumatda bildirilir.

    Ətraflı   14:52     22-Feb-2020     2208
  • alternative title

    Xaçmazda Biznes İnkubasiya Mərkəzi fəaliyyətə başladı - FOTO

    Xaçmaz KOB İnkişaf Mərkəzində gənclər və qadınlar üçün Biznes İnkubasiya Mərkəzi fəaliyyətə başlayıb. Biznes İnkubasiya Mərkəzi Quba-Xaçmaz iqtisadi rayonunda sahibkarlıq təşəbbüslərinin dəstəklənməsi, yeni biznes və məşğulluq imkanlarının yaradılması, sahibkarlara göstərilən dövlət dəstəyi tədbirlərinin əhatə dairəsinin daha da genişləndirilməsi məqsədilə yaradılıb. Burada rezidentlərə biznes layihələrin hazırlanması, maliyyə resurslarına çıxış imkanları və maliyyənin idarə olunması, mentor və digər xidmətlər göstərilir. Qeyd edək ki, Azərbaycan Respublikasının Kiçik və Orta Biznesin İnkişafı Agentliyi tərəfindən ötən ilin dekabr ayında inkubasiya iştirakçılarının seçilməsi məqsədilə müsabiqə elan edilib, istehsal və xidmət sahələri üzrə 35 rezident seçilib. Rezidentlər Biznes İnkubasiya Mərkəzində güzəştli şərtlərlə zəruri avadanlıqlarla təchiz edilmiş işçi otaqlarla təmin olunacaq və onlara xidmətlərdən hər cür faydalanmaq imkanı yaradılacaq.

    Ətraflı   14:32     22-Feb-2020     1189
  • alternative title

    Azərbaycanda bu şəxslərin maaşları artacaq

    Bu yaxınlarda tibb işçilərinin maaşları ciddi şəkildə artacaq. Bunu REAL TV-yə İcbari Tibbi Sığorta üzrə Dövlət Agentliyinin sədri Zaur Əliyev bildirib. O, nəzərdə tutulan artımı icbari tibbi sığortanın tətbiqi ilə əsaslandırıb. İcbari Tibbi Sığorta üzrə Dövlət Agentliyinin sədri Zaur Əliyevlə geniş müsahibəyə bazar günü saat 21:00-da efirə gedəcək “Mir Şahinin vaxtı” verilişində baxmaq olar.

    Ətraflı   11:00     22-Feb-2020     308
  • alternative title

    Bakı Metropolitenində koronavirusla bağlı profilaktik tədbirlərə başlanılıb

    Bakı Metropolitenində koronavirus infeksiyasına qarşı əks-epidemik tədbirlərə başlanılıb. Tədbirlər profilaktik məqsədlə insanların daha çox təmasda olduğu stansiya və qatarlarda aparılacaq. AZƏRTAC xəbər verir ki, aparılan əks-epidemik tədbirlər infeksiyanın yoluxma mexanizmləri və yollarına qarşı yönəlmiş tədbirlərdir. Sərnişin axınının intensivliyi, sıxlığı, müntəzəm təmas şəraiti, təbii ventilyasiyanın qeyri-intensivliyi, günəş şüalarının daxil olmaması metropolitendə ehtiyat tədbirlərinin gücləndirilməsini tələb edir. Bu məqsədlə “Bakı Metropoliteni” QSC xüsusi lisenziya ilə fəaliyyət göstərən və bu sahə üzrə ixtisaslaşmış xidmətlə birlikdə sanitar-gigiyenik tədbirlərin keçirilmə qaydasını, istiqamətlərini, profilaktik vasitələrin təhlükəsiz tətbiqi imkanlarını araşdıraraq, dezinfeksiya tədbirlərinə başlayıb. Ardıcıl tədbirlərə fevralın 21-dən “Nərimanov” elektrik deposundaki qatarlarda başlanılıb. İş gününün qrafikinə uyğun olaraq bütün vaqonlar mərhələli şəkildə tam həcmdə dezinfeksiya olunacaq. Bu tədbirlər stansiyalarda gecə növbəsində təşkil ediləcək. İşlər hər bir stansiyada, ayda iki dəfə olmaqla, keçidlərdə, vestibüllərdə, platformalarda və yollarda görüləcək. Qatarlarda və stansiyalarda görüləcək tədbirlərin də qrafiki artıq müəyyən olunub. Bundan savayı, sərnişinlərin daha çox təmasda olduğu eskalator sürahisi, giriş-çıxış qapıları və əllə toxunula biləcək digər səthlər hər gün bir neçə dəfə dezinfektantlarla təmizlənəcək. Dezinfeksiya zamanı “ProGreen ProFix” dərman vasitəsindən istifadə olunur. Dərman maddəsi geniş spektrlidir, bütün növ mikroblar üçün təyinatlıdır. Koronavirusa qarşı gücləndirilmiş ehtiyat tədbirləri səlahiyyətli qurumların müvafiq göstəriş və təlimatlarına müvafiq olaraq davam etdiriləcək. Bakı Metropolitenində sanitar-gigiyenik norma və qaydaların tələblərinin yerinə yetirilməsinə xüsusi diqqət yetirilir. Qatar, stansiya, şaxta və tunellərdə, eləcə də digər istismar və tikinti obyektlərində sanitar-gigiyenik normaların tələblərinə uyğun olaraq, planlı şəkildə dezinseksiya (həşəratlarla mübarizə), deratizasiya (gəmiricilərlə mübarizə) və profilaktik məqsədlə dezinfeksiya (mikroblarla mübarizə) tədbirləri müntəzəm surətdə həyata keçirilir. Görülən işlərə daim nəzarət olunur, qurğuların müntəzəm monitorinqi aparılır. Ehtiyac olarsa, epidemik vəziyyətin tələbinə uyğun sanitar-gigiyenik tədbirlərin təkrarlanması da diqqətdə saxlanılır. Qeyd olunan tədbirlər zamanı yeraltı şəraitdə istifadəsi məqsədəuyğun hesab olunan dərman vasitələrdən istifadə edilir. Dərman maddələrinin insan orqanizminə və ətraf mühitə zərərli təsirinin olmamasına xüsusilə diqqət yetirilir. Əlavə olaraq, müvafiq laboratoriya ən müasir ölçmə cihazları vasitəsilə stansiya, tunel və qatarlarda, həmçinin xidməti otaqlarda mikroiqlim şəraitini gündəlik qrafik əsasında yoxlayır. Bütün tədbirlər metropoliten işçilərinin normal fəaliyyət göstərmələri üçün sanitar-gigiyenik normalara uyğun sağlam və təhlükəsiz əmək şəraitinin yaradılmasını təmin etməklə bərabər, metrodan istifadə edən paytaxt sakinlərinin, eləcə də şəhərimizin qonaqlarının da rahat şəkildə daşınmasına xidmət edir. “Bakı Metropoliteni” QSC sərnişinlərini metropolitendə sanitar-gigiyenik normaların tələblərinə riayət etməyə, bu məsələlərdə fəal mövqe tutmağa dəvət edir. Stansiya və qatarların zibillənməməsi, təmizliyə riayət olunması, qida, yeyinti və kulinariya məhsullarının, ən əsası, saqqız və sair bu kimi fəal və dayanıqlı mikrob daşıyıcılarının təmas olunan yerlərə atılmamasına, yapışdırılmamasına və digər bu kimi hallara yol verilməməsi mühüm əhəmiyyət kəsb edir. Xəstəliklərin yayılmasının qarşısının alınması, ətraf mühitin mühafizəsi, metropolitendə təmizliyin qorunması, ilk növbədə, hər bir sərnişinin sağlamlığı baxımından çox vacibdir. Yaxın günlərdə sərnişinlərin məlumat əldə etməsi və maariflənməsi, təbliğatın daha geniş kütlə arasında yayılması məqsədilə koronavirusla bağlı daha bir mühüm korporativ sosial məsuliyyət proqramı da reallaşdırılacaq.

    Ətraflı   17:39     21-Feb-2020     236
  • alternative title

    KOBİA Kiçik və Orta Müəssisələr üçün Beynəlxalq Şəbəkəyə üzv oldu

    Azərbaycan Respublikasının Kiçik və Orta Biznesin İnkişafı Agentliyi (KOBİA) Kiçik və Orta Müəssisələr üçün Beynəlxalq Şəbəkəyə (INSME) üzv qəbul edilib. 2000-ci ildən İqtisadi Əməkdaşlıq və İnkişaf Təşkilatının (OCED) nəzdində fəaliyyət göstərən INSME sıralarında 30 ölkədən 70-ə yaxın üzvü birləşdirir. Mənzil qərargahı İtaliyada yerləşən təşkilatın missiyası müxtəlif ölkələrdə KOB sahəsində fəaliyyət göstərən qurumlar arasında texnologiyalar və təcrübə mübadiləsini asanlaşdırmaq, bu sahədə qabaqcıl metodologiya və mexanizmləri, dövlət-özəl dialoqunu təşviq etmək, beynəlxalq tərəfdaşlığı genişləndirməkdir. KOBİA-nın INSME-yə üzv olması KOB sahəsində qabaqcıl xarici təcrübənin öyrənilməsi və ölkəmizdə tətbiqinə, müvafiq sahədə fəaliyyət göstərən təşkilatlar və KOB subyektləri arasında effektiv əlaqələrin qurulmasına, kiçik və orta biznes sahəsində əməkdaşlığın genişləndirilməsinə imkan verəcək.

    Ətraflı   17:24     21-Feb-2020     1251
  • alternative title

    Mərkəzi Bank yeni kommunikasiya məhsulunu təqdim edib

    Azərbaycan Mərkəzi Bankı (AMB) yeni kommunikasiya məhsulunu təqdim edib. Bankdan AZƏRTAC-a bildirilib ki, video sual-cavab formatında olan kommunikasiya məhsulunun ilk mövzusu “Ani ödənişlər sistemi”nə həsr olunub. “Ani ödənişlər sistemi”nin ilkin mərhələsi iyunda istismara veriləcək Mərkəzi Bankın “Ani ödənişlər sistemi” bölməsinin və layihəsinin rəhbəri Emil Abbasov deyib ki, 7/24/365 rejimli “Ani ödənişlər sistemi”nin ilkin mərhələsi bu ilin iyununda, tam mərhələ isə ilin sonunadək istifadəyə veriləcək. “Ani ödənişlər sistemi” mövcud ödəniş ekosistemi ilə tam inteqrasiya edilmiş formada yaradılacaq. Hökumət ödəniş portalı ilə inteqrasiya nəticəsində portalda mövcud olan 550-dən çox xidmət növü üzrə ödənişləri real rejimdə həyata keçirmək mümkün olacaq. Bu xidmət növlərinə vergi, rüsum, icarə haqqı və digər büdcə ödənişlərinin toplanması, kütləvi xidmət müəssisələri üzrə ödənişlər və sair daxildir. Sistemə inteqrasiya ediləcək digər qurum isə banklar olacaq. Banklar öz daxili sistemlərini “iOS”un tələbləri əsasında inkişaf etdirərək müştərilərə 7\24 rejimində işləmək imkanı verəcək. Sistemin əsas özəlliyi ondan ibarətdir ki, burada üçüncü tərəf ödənişləri inisasiya edilə biləcək. Üçüncü tərəflərə sistemin portalı da daxildir. Sistemə inteqrasiya ediləcək digər təşkilat isə kart infrastrukturunun ekvarinq şəbəkəsi və nəzarət-kassa aparatlarının operatorları olacaq. Bu inteqrasiyalar nəticəsində ATM-dən, POS-terminallardan, kassa aparatlarından ani ödənişləri həyata keçirmək mümkün olacaq. Sistemdə, həmçinin bank olmayan ödəniş xidməti təchizatçıları üçün funksional inteqrasiya metodları hazırlanıb. “Layihənin gedişatı zamanı Azərbaycanda milli ödəniş infrastrukturunda istifadə olunmaq üçün QR kod standartları hazırlanıb. Bu standartlardan həm ani ödənişlər sistemində, həm də ani ödənişlərdən kənar əməliyyatlarda istifadə etmək mümkündür. Layihə çərçivəsində yaradılan digər mühüm funksionallıqlardan biri də “Açıq bankçılıq”dır. “Açıq bankçılıq” vasitəsilə müştərilərin icazələri çərçivəsində üçüncü tərəflərin elektron bankinqindən ödənişlərin həyata keçirilməsi, hesab üzrə məlumatların əldə edilməsi mümkündür”, - deyə o bildirib. Qeyd edək ki, “Ani ödənişlər sistemi” hazırda 50 ölkədə tətbiq olunur, 10 ölkədə isə tətbiqi üzrə işlərə başlanılıb.

    Ətraflı   16:41     21-Feb-2020     1411
  • alternative title

    Baş nazir komissiyanın bir səlahiyyətini ləğv etdi

    Nazirlər Kabineti özünün “Yol Hərəkəti Təhlükəsizliyi Komissiyasının Əsasnaməsi haqqında” qərarında dəyişiklik edib. QALANEWS-un xəbərinə görə, bununla bağlı Baş nazir Əli Əsədov qərar imzalayıb. Nazirlər Kabineti qərara alıb ki, yuxarıda adıçəkilən Əsasnamənin 3-cü hissəsinin ikinci abzası ləğv edilsin. Bundan əvvəlki qərarla (1999-cu il 11 avqust tarixli) Əsasnamənin 3-cü hissəsinin ikinci abzasında yazılırdı ki, Komissiya avtomobil yollarında yol hərəkətini nizamlayan texniki vasitələrin quraşdırılmasına icazə verir. Əli Əsədovun qərarı ilə Komissiyanın bu səlahiyyəti əlindən alınıb. Qeyd edək ki, qərar Azərbaycan Prezidentinin 2019-cu il 28 avqust tarixli fərmanının 1.3-cü bəndini təmin etmək məqsədi ilə imzalanıb. “Yol Hərəkəti haqqında” qanunun 9-cu maddəsinin 9-cu bəndinə əsasən avtomobil yollarında yol hərəkətini nizamlayan texniki vasitələr müvafiq icra hakimiyyəti orqanının icazəsi ilə quraşdırılır. Bundan sonra avtomobil yollarında svetoforlar, yol nişanları, nişanlama xətləri və yol hərəkətinin təşkilinin digər texniki vasitələri Daxili İşlər Nazirliyi, Bakıda isə Bakı Nəqliyyat Agentliyinin (svetoforlar və yol nişanlarına münasibətdə Daxili İşlər Nazirliyinin Baş Dövlət Yol Polisi İdarəsinin rəyi nəzərə alınmaqla) qərarı ilə Nazirlər Kabinetinin müəyyən etdiyi qaydaya uyğun olaraq tətbiq olunacaq.

    Ətraflı   12:45     21-Feb-2020     1444
  • alternative title

    Azərbaycan neftinin bir barreli 62,20 dollara satılır

    Azərbaycan neftinin qiyməti bahalaşıb. AZƏRTAC xəbər verir ki, “Azeri Light” markalı neftin bir barrelinin qiyməti 0,04 dollar artaraq 62,20 dollar təşkil edib. Qeyd edək ki, Azərbaycan neftinin bir barrelinin qiyməti 2001-ci ilin dekabrında minimuma enərək 19,15 dollar, 2008-ci ilin iyulunda isə maksimuma yüksələrək 149,66 dollar olub.

    Ətraflı   11:40     21-Feb-2020     1377
  • alternative title

    SOCAR büdcə ödənişlərini artırıb

    SOCAR 2019-cu ildə dövlət büdcəsinə 1,62 milyard manat ödəyib. Şirkətdən AZƏRTAC-a bildirilib ki, SOCAR-ın büdcə ödənişləri əvvəlki ilə nisbətən təqribən 1 faiz artıb. 2019-cu ildə şirkətin büdcəyə ümumi ödənişlərində aşağıdakı vergilər əsas paya malikdir: aksiz vergisi 28 faiz, əlavə dəyər vergisi 18 faiz, mənfəət vergisi 16 faiz, ixrac vergisi 10 faiz, mədən vergisi 8 faiz, gəlir vergisi 5 faiz, əmlak vergisi, torpaq vergisi, yol vergisi, mənbədən vergi də daxil olmaqla digər vergi və ödənişlər ümumi ödənişlərin 15 faizini təşkil edib. SOCAR, həmçinin hesabat ilində Dövlət Sosial Müdafiə Fonduna 173,6 milyon manat vəsait ödəyib.

    Ətraflı   11:36     21-Feb-2020     1540
  • alternative title

    Aksiz markası olmayan malların satış məqsədilə saxlanması faktı aşkarlanıb

    İqtisadiyyat Nazirliyi yanında Dövlət Vergi Xidmətinin Vergi Cinayətlərinin İbtidai Araşdırılması Baş İdarəsi tərəfindən keçirilmiş operativ vergi nəzarəti tədbiri zamanı Bakının Yasamal rayonu, Şərifzadə küçəsi 241E ünvanında yerləşən, fiziki şəxs Nizaməddinov Nizami Möhübbət oğluna məxsus mağazada aksiz markaları ilə markalanmamış 48 şüşə alkoqollu içki və 10 min 813 qutu tütün məmulatları aşkar olunaraq götürülüb. Dövlət Vergi Xidmətindən bildirilib ki, faktla bağlı cinayət işi açılıb, N.Nizaməddinov barəsində Yasamal Rayon Məhkəməsinin qərarı ilə həbs qətimkan tədbiri seçilib. Vergi orqanları belə halların qarşısının alınması və təqsirkar şəxslərin məsuliyyətə cəlb olunması istiqamətində tədbirləri davam etdirəcək. Vətəndaşlardan bu cür saxta malların satışı faktlarına rast gəldikdə, dərhal əlaqədar dövlət orqanlarına müraciət etmələri xahiş olunur. Aksiz markası ilə markalanmalı olan malların istehlakçıları bilməlidirlər ki, iqtisadi mahiyyətinə görə, belə məhsullara aksizlərin tətbiqinin əsas məqsədlərindən biri də sağlamlığa zərərli məhsulların qeyri-qanuni və keyfiyyətsiz istehsalının qarşısını almaq, istehsal mənşəyini müəyyən etməkdir. Aksiz markası olmadan və ya saxta aksiz markası ilə markalanmış məhsulları almaqla istehlakçı keyfiyyəti, istehsal və saxlanma şəraiti bəlli olmayan və sağlamlıq üçün zərərli məhsullarla üzləşmə təhlükəsi ilə qarşılaşır, eyni zamanda, aksizsiz məhsulların qaçaqmalçılığının və istehlak bazarında saxta məhsulların satışının genişlənməsinə və dövlət büdcəsinin gəlirlərdən məhrum olmasına şərait yaradır.

    Ətraflı   11:33     21-Feb-2020     1677
  • alternative title

    Çay ixracı azalıb

    Yanvarda ölkədən 46,8 ton çay ixrac edilib. QALANEWS Dövlət Gömrük Komitəsinə istinadla xəbər verir ki, ixrac edilən çayın dəyəri 317 min ABŞ dolları olub. Xatırladaq ki, 2019-cu ilin yanvarında Azərbaycandan dəyəri 659 min dollar olmaqla 108 tonadək çay ixrac edilib.

    Ətraflı   18:32     20-Feb-2020     366
  • alternative title

    SOCAR və “Snam” arasında saziş imzalandı

    SOCAR və dünyanın qabaqcıl enerji infrastrukturu şirkətlərindən biri olan “Snam” arasında bərpa olunan qazlar və dayanıqlı enerjidən istifadənin inkişaf etdirilməsi, habelə həmin qazların gələcəkdə Cənub Qaz Dəhlizi və Trans Adriatik Boru Kəməri (TAP) vasitəsilə nəqli üzrə əməkdaşlıq haqqında saziş imzalayıblar. SOCAR-dan verilən məlumata görə, hər iki şirkət TAP konsorsiumunda 20% paya sahibdir və Cənub Qaz Dəhlizinin ən böyük səhmdarlarındandır. Saziş Romada Azərbaycan Respublikasının prezidenti İlham Əliyev və İtaliyanın baş naziri Cuzeppe Kontinin iştirakı ilə SOCAR və “Snam” şirkətlərinin nümayəndələri tərəfindən imzalanıb. SOCAR və “Snam” arasındakı saziş enerji transformasiyası və dövri iqtisadiyyat ilə bağlı olan sahələrdə əməkdaşlığı əhatə edir: Bioqaz və biometandan istifadənin araşdırılması və inkişafı, həmçinin, anaerob emal müəssisələrin yaradılması üçün imkanların araşdırılması. Bu tipli müəssisələrin layihələndirilməsində və tikintisində “Snam”ın törəmə şirkəti olan “IES Biogas”ın təcrübəsi tətbiq oluna bilər. SOCAR və “Snam” bu məsələ ilə bağlı potensial birgə investisiya imkanlarını qiymətləndirməyi planlaşdırır; yeni yanacaqpaylayıcı məntəqələri inkişaf etdirməklə və sıxılmış təbii qaz (CNG), maye təbii qaz (LNG) və hidrogendən (H2) istifadə etməklə dayanıqlı nəqliyyatın dəstəklənməsi. “Snam”ın törəməsi olan “Cubogas” bu layihəyə cəlb oluna bilər. Avtomobil istehsalçıları ilə əməkdaşlığın qurulması və avtomobillərin modifikasiya olunması da mümkündür, hidrogen istehsalı və müvafiq infrastrukturun inkişafı üçün mövcud imkanların araşdırılması. “Bu layihə vasitəsilə Snam və SOCAR Azərbaycanda enerji transformasiyası və dövri iqtisadiyyata töhfə verərək, iki ölkə arasında əməkdaşlığı möhkəmləndirmək niyyətindədirlər. Bundan başqa, biometan və hidrogenin inkişafı Cənub Qaz Dəhlizi və TAP kəməri vasitəsilə bərpaolunan qazların nəqli üçün yeni imkanlar yarada bilər və beləliklə etibarlı və çevik təchizat ilə yanaşı ekoloji davamlılığı artırar”, - deyə “Snam”ın baş direktoru Marko Alvera bildirib. “SOCAR ətraf mühitə neqativ təsirlərin minimuma endirilməsi üzrə fəaliyyətində əhəmiyyətli addımlar atıb. Bu saziş enerji sənayesində davamlılığa doğru atılan daha bir mühüm addımdır. Bu addımın məqsədi ekoloji cəhətdən təmiz bir iqtisadiyyat yaratmaq, qlobal istiləşmənin məhdudlaşdırılmasına töhfə vermək , insanların rifah halının və həyat səviyyəsinin dayanıqlı inkişafına nail olmaqdır”, - deyə SOCAR-ın prezidenti Rövnəq Abdullayev qeyd edib.

    Ətraflı   18:21     20-Feb-2020     301
  • alternative title

    Bakıda yerli şirkətlərin məhsullarından ibarət sərgi keçirilir - FOTO

    Fevralın 20-də Bakı İdman Sarayında yerli məhsulların və xidmətlərin tanıdılması məqsədilə “Partners and Business” sərgisi öz işinə başlayıb. Azərbaycan Respublikasının Kiçik və Orta Biznesin İnkişafı Agentliyi (KOBİA), Sahibkarlar (İşəgötürənlər) Təşkilatları Milli Konfederasiyası, “Kapital Bank” və “Marsol” MMC-nin birgə təşkilatçılığı ilə keçirilən sərgidə sənaye, kənd təsərrüfatı, qida, İKT, təhsil, inşaat, logistika, tekstil, xidmət və s. sahələrdə yerli şirkətlər tərəfindən istehsal olunan məhsullar və xidmətlər təqdim olunur. Ümumilikdə, sərgidə 150-ə yaxın şirkət tərəfindən istehsal olunan məhsullar və xidmətlər nümayiş olunur. Sərginin təşkilində məqsəd Azərbaycan şirkətlərinin daha geniş tanıdılması, bazarlara çıxış imkanlarının genişləndirilməsi, yerli şirkətlər arasında biznes tərəfdaşlığının inkişaf etdirilməsi, yeni əməkdaşlıq əlaqələrinin qurulmasıdır. Sərgidə həmçinin, KOBİA-nın dəstəyi ilə sənaye, xidmət, turizm, logistika, inşaat, sənətkarlıq və s. sahələrdə 20-yə yaxın kiçik və orta sahibkarlıq subyektinin ödənişsiz olaraq məhsul və xidmətlərini təqdim etməsi üçün xüsusi stend yaradılıb. Fevralın 22-dək davam edəcək sərgi çərçivəsində biznesin təşkili və proqnozlaşdırılması, sahibkarlıq sahəsində qanunvericilik, effektiv satış texnikaları, əmək münasibətləri, məşğulluq kimi mövzularda təlimlər, biznes inkişaf yazarlarının kitab təqdimatları keçiriləcək, sahibkarlara məsləhət xidmətləri göstəriləcək.

    Ətraflı   17:35     20-Feb-2020     373
  • alternative title

    Gömrük Komitəsi yararsız məhsulları yandıraraq məhv edib

    Fevralın 20-də Dövlət Gömrük Komitəsinin (DGK) müvafiq qurumları tərəfindən istifadəyə yararsız, mənşəyi bilinməyən, həmçinin dövriyyəsi məhdudlaşdırılan və qadağan olunan malların məhvetmə prosesi həyata keçirilib. Komitənin Mətbuat və İctimaiyyətlə Əlaqələr İdarəsindən bildirilib ki, ümumilikdə 263 min 29 ədəd fişəng və prirotexniki vasitə, 47 min 322 ədəd müxtəlif adda dərman preparatı, 59 ədəd yarasız müxtəlif markalı telefon və aksesuarları, 5077 litr alkoqollu və kustar üsulla 4742 ədəd sərinləşdirici içki, 5255 kiloqram ərzaq və qeyri-ərzaq məhsulları, 3070 kiloqram yuyucu vasitə, 2167 kiloqram müxtəlif növ məişət malları məhv edilib. Məhv edilən mallar fiziki şəxslər tərəfindən Nazirlər Kabinetinin 305 saylı Qərarı ilə müəyyənləşdirilən normalara əməl olunmadan gömrük sərhədindən keçirilməyə cəhd göstərildiyi üçün müvəqqəti saxlanc anbarına qəbul olunan və saxlanc müddətində vətəndaşlar tərəfindən həmin malların geri götürülməsinə dair müraciət olunmayan, eyni zamanda, istifadəyə yararsız, mənşəyi bilinməyən, həmçinin dövriyyəsi məhdudlaşdırılmış və qadağan olunmuş kateqoriyalara aiddir. Məhv edilən mallar arasında Ermənistan istehsalı olan 324 ədəd suvenir, 40 qutu siqaret və 18 litr müxtəlif növ spirtli içkilər də olub. Müvafiq ekspert rəyi və məhkəmə qərarına əsasən, məhvetmə prosesinə cəlb olunan mallar Sumqayıt şəhəri yaxınlığındakı ekoloji poliqonda DGK-nın müvafiq qurumlarının əməkdaşları və media nümayəndələrinin iştirakı ilə yandırılaraq məhv edilib.

    Ətraflı   16:37     20-Feb-2020     1441
  • alternative title

    Nazirdən bələdiyyələrlə bağlı QƏRAR – Vaxt müəyyənləşdirildi

    Ədliyyə Nazirliyi Kollegiyasının 2012-ci il 19 mart tarixli qərarı ilə təsdiqlənmiş “Bələdiyyələrin fəaliyyətinə inzibati nəzarətin təşkili haqqında Təlimat”da dəyişiklik edilib. Bu barədə Ədliyyə naziri Fikrət Məmmədov qərar imzalayıb. Qərarla sənədin 2.5.1-ci bəndində dəyişiklik olunub. Həmin bənd bələdiyyə aktının Konstitusiyaya, qanunlara, Prezidentin fərmanlarına və Nazirlər Kabinetinin qərarlarına zidd olduğu məqamlarla bağlıdır. Əgər bələdiyyə aktı Konstitusiyaya və ölkə başçısının fərmanlarına və Nazirlər Kabinetinin qərarlarına zidd olarsa, qanunvericiliklə müəyyən olunmuş qaydada dəyişdirilməsi və ya ləğv edilməsi barədə onu qəbul etmiş bələdiyyəyə müraciət göndərilir. Müraciətdə ziddiyyətin məzmunu, onun aradan qaldırılmasına dair təkliflər olmalıdır. Həmin təkliflərlə bağlı görülmüş tədbirlər barədə məlumat təqdim olunmasının zəruriliyi göstərilməlidir. Bələdiyyə aktının və ya aktlarının surətinin əlavə edilməsi isə vacibdir. Sənədin əvvəlki variantında müraciət edilməsi üçün müddət göstərilməmişdi. Yeni qərarla isə müraciət bundan sonra 5 iş günü müddətində təqdim olunmalıdır. Bələdiyyə tərəfindən müraciətə baxılması qaydasında dəyişiklik olub. F.Məmmədovun qərarı ilə həmin müraciətə 5 iş günü müddətində bələdiyyə iclasında baxılmalıdır. Bunun nəticəsi barədə inzibati nəzarəti həyata keçirən orqana məlumat verilməlidir. Qərarla 2.5.2-ci bənd də dəyişdirilib. “Göstərilən ziddiyyət aradan qaldırılmadıqda bələdiyyələrlə iş mərkəzi və regional ədliyyə idarələri tərəfindən müvafiq bələdiyyəyə müraciət edildiyi vaxtdan 15 gün ərzində iddia ərizəsi hazırlanaraq aidiyyəti məhkəməyə göndərilir. Bu barədə müvafiq bələdiyyə dərhal məlumatlandırılır”, - əvvəlki qərarda belə yazılırdı. Yeni variantda isə “ziddiyyət” sözündən sonra “müəyyən olunmuş müddət ərzində” ifadəsi əlavə olunur. 2.5.3 yarımbənddə yazılırdı ki, bələdiyyə aktlarında yol verilmiş nöqsanların aradan qaldırılması məqsədi ilə bələdiyyəyə tövsiyə məktubu göndərilir. Yeni sənəddə isə bu cümlə çıxarılıb.

    Ətraflı   16:11     20-Feb-2020     1271
  • alternative title

    Pambıq lifi və ipliyinin ixracı azalıb

    Bu ilin yanvarında Azərbaycandan 7,8 min ton pambıq lifi və 1260 ton pambıq ipliyi ixrac edilib. AZƏRTAC Dövlət Gömrük Komitəsinin (DGK) məlumatına istinadla xəbər verir ki, ixrac edilən pambıq lifinin dəyəri 10,5 milyon, pambıq ipliyinin dəyəri isə 2,8 milyon ABŞ dolları olub. Xatırladaq ki, ötən ilin eyni ayında ölkədən 11,9 milyon dollarlıq 8,2 min ton pambıq lifi, 859 min dollarlıq 340 ton pambıq ipliyi ixrac edilib.

    Ətraflı   16:00     20-Feb-2020     1210

Weather icon

humidity: 10%







Sosİal medİa

FACEBOOK-DA BİZƏ QOŞULUN

@qalanews

ŞAHİDİ OLDUĞUNUZ HADİSƏLƏRİ ÇƏKİB BİZİMLƏ PAYLAŞIN

BİZİ TWITTER-DƏ İZLƏYİN

@qalanews

BİZİ INSTAGRAM-DA İZLƏYİN

@qalanews

BİZİ YOUTUBE-DA İZLƏYİN

@qalanews

Hadİsə

  • alternative title 12:40     24-Feb-2020     1023
  • alternative title 11:59     24-Feb-2020     1352
  • alternative title 11:54     24-Feb-2020     1121
  • alternative title 11:37     24-Feb-2020     324
  • alternative title 17:38     22-Feb-2020     1724
image title here

Some title