Loading alternative title

Covid-19

  • alternative title

    Son 24 saat ərzində İranda koronavirusdan 399 nəfər ölüb

    Bu günə olan məlumata görə İranda 8 min 293 nəfər koronavirusa yoluxub, 399 nəfər isə həyatını itirib edib. QALANEWS xəbər verir ki, bu barədə məlumatı İranın Səhiyyə Nazirliyinin nümayəndəsi Sima Səadət Lari verib. Onun sözlərinə görə İranda virusa yoluxanların ümumi sayı 596 min 941 nəfər, ölənlərin sayı isə 34 min 113-ə çatıb. Müalicəsi davam edən 5 min 55 xəstənin vəziyyəti ağır olaraq qalır. Bununla yanaşı 472 min 598 nəfər sağalaraq evə buraxılıb.

    Ətraflı   17:22     29-Oct-2020     1204
  • alternative title

    Avropa ölkələri arasında COVID-19-a yoluxma üzrə ən aşağı göstərici Estoniyada qeydə alınıb

    Avropanın “Helsingin Sanomat” qəzeti tərəfindən yayımlanan müqayisəli rəqəmlərə əsasən, hazırda koronavirus infeksiyasının yayılması üzrə ən aşağı temp Estoniya, Norveç, Finlandiya, Serbiya və Kosovoda müşahidə olunur. Avropada COVID-19-a yoluxma üzrə ən yüksək göstəricilər Vatikan, Andorra, Belçika və Çexiyada müşahidə olunur. Bu ölkələrdə son iki həftə ərzində 100 min nəfər əhalinin payına orta hesabla 1316-1888 yoluxma halı düşür. Estoniya ilə qonşu olan ölkələrdə ümumi yoluxma göstəricisi Finlandiyada 51,4, Latviyada 106,5, İsveçdə 120,2, Rusiyada 145,2 və Litvada 149,2 hal təşkil edir.

    Ətraflı   17:20     29-Oct-2020     323
  • alternative title

    Hindistanda COVID-19-a yoluxanların sayı 8 milyonu ötüb

    Ötən gün Hindistanda COVID-19 infeksiyasına 49 min 912 yoluxma qeydə alınıb. Bununla da ölkədə virusa yoluxanların ümumi sayı 8 milyonu ötüb. Hindistan koronavirusa yoluxma sayı 8 milyonu ötən ikinci ölkədir. QALANEWS pandemiyanın statistikasını aparan “Worldometers” saytına istinadla xəbər verir ki, Hindistanda ötən gün COVID-19 infeksiyası səbəbindən 509 ölüm qeydə alınıb. Bununla da ölkədə pandemiya qurbanlarının sayı 120 min 563-ə çatıb. Ötən gün Hindistanın Qadın və Uşaqların İnkişafı naziri Smitri İraninin də virusa yoluxduğu təsdiqlənib. Nazir bu barədə sosial şəbəkədə məlumat verib və son günlər onun yaxın təmasda olan şəxslərin koronavirus testindən keçməsini xahiş edib. Oktyabrın 27-də isə Hindistanın Sosial Ədalət və Hüquqların Qorunması naziri A.Ramdasın da COVID-19-a yoluxduğu aşkarlanmışdı. Dehlinin Təhsil naziri Manish Sosdia növbəti qərar verilənədək paytaxtdakı bütün məktəblərin pandemiya səbəbindən bağlı qalacağını açıqlayıb. Qeyd edək ki, Hindistan hazırda yoluxanların ümumi sayına görə ABŞ-dan sonra ikinci, ölüm sayına görə isə ABŞ və Brazilayanın ardından 3-cü sıradadır.

    Ətraflı   17:19     29-Oct-2020     313
  • alternative title

    Böyük Britaniyada hər gün təqribən 100 min insan koronavirus xəstəliyinə tutulur

    Böyük Britaniyada hər gün təqribən 100 min insan koronavirus xəstəliyinə tutulur. London İmperial Kollecində aparılan araşdırmada epidemiyanın yayılmasının sürətləndiyi və virusa yoluxanların sayının hər 9 gündə iki dəfə artdığı açıqlanıb. Tədqiqatçılar virusun yayılmasında kritik mərhələ olduğunu söyləyiblər. Ölkənin bütün hissələrində virusa yoluxmada artım müşahidə olunur. Hökumət regional karantin strategiyasına sadiq qalaraq Notinqamşayrda yenidən gücləndirilmiş karantin rejiminin tətbiqinə başlayır. Cümə günündən etibarən yeni qaydaların tətbiq olacağı Notinqamşayrda idman zalları, üzgüçülük mərkəzləri və bəzi ictimai yerlərin fəaliyyəti dayandırılacaq.

    Ətraflı   16:58     29-Oct-2020     363
  • alternative title

    Latviyada COVID-19 infeksiyasına görə gündəlik test sayı 8 minə çatdırılacaq

    Latviya hökuməti COVID-19 infeksiyasına görə test imkanlarını 60 faiz artırmaq və 7-12 sinif şagirdləri üçün distant təhsilin müddətini uzatmaq barədə qərar qəbul edib. QALANEWS ölkə mətbuatına istinadla xəbər verir ki, bu sözləri Latviyanın Baş Naziri Krişyanis Karinş söyləyib. Bildirilib ki, hökumət bu həftənin sonuna qədər COVID-19 infeksiyasına görə test imkanlarını 60 faiz (günə 8000-ə qədər test) artırmaq barədə qərar qəbul edib və gələcəkdə də koronavirus infeksiyasına görə test imkanlarının artırılması planlaşdırılır. Baş Nazir bildirib ki, bundan başqa hökumət 7-12 sinif şagirdləri üçün distant təhsilin müddətini 15 noyabr tarixinədək uzadır.

    Ətraflı   16:57     29-Oct-2020     337
  • alternative title

    Fahrettin Koca: Pandemiya təkcə səhiyyə işçilərinin həll edə biləcəyi problem deyil

    İlk dəfədir ki, Türkiyənin koronavirus üzrə elmi şurasının iclası İstanbulda, ümumiyyətlə Ankaradan kənarda keçirilir. Bu adi hal deyil. Səbəb isə ölkə üzrə hər 10 COVID-19 xəstəsindən dördünün İstanbulda olmasıdır. Bu fikirləri Türkiyənin Səhiyyə naziri Fahrettin Koca ölkənin koronavirus üzrə elmi şurasının İstanbulda keçirilən iclasından sonra açıqlamasında bildirib. Bütün Türkiyənin İstanbulla təmasda olduğunu vurğulayan nazir bu şəhərdə xəstəliyin nəzarət altına alınmamasının hər bölgə üçün təhlükə yarada biləcəyini deyib: “İstanbul dünyanın əhali baxımından ən sıx şəhərlərindəndir. Şəhərin sərnişindaşıma da daxil olmaqla bütün ictimai yerləri yoxlamalardan keçirildi. Ən kiçik ehtiyatsızlıq böyük problemlərə yol aça bilər. Burada əsası test nəticələri müsbət çıxanların təmasda olduğu şəxsləri əksiksiz aidiyyəti qurumlara bildirməsidir”. Türkiyə, eləcə də İstanbul səhiyyəsinin çox güclü təməllər əsasında qurulduğunu qeyd edən F.Koca deyib: “İstanbulda ümumilikdə təxminən 48 min xəstə üçün müalicə imkanı var ki, onlardan da 9 minə yaxını reanimasiya şöbələrinin payına düşür. Hazırda İstanbulda xəstəxanalarda doluluq səviyyəsi 55 faizdir. Reanimasiya şöbələrində bu rəqəm 66 faiz təşkil edir, nəfəs cihazlarının isə 33 faizi istifadə olunur. Xəstə sayının iki və ya üç dəfə artması təqdirdə özəl xəstəxanaların da 25 faizinin bu istiqamətdə istifadə olunması ilə bağlı müzakirələr aparılır. Unutmayaq ki, pandemiya təkcə səhiyyə işçilərinin həll edə biləcəyi problem deyil”. Oktyabrın 28-nə COVID-19 nəticələrini açıqlayan nazir deyib: “Bu gün 128 min 312 nəfər testdən keçirilib. Onlardan 2305-də xəstəlik aşkarlanıb. 77 nəfər virusdan dünyasını əyişib. Bu gün Türkiyədə 1662 nəfərin sağalması ilə ölkə üzrə ümumi sağalanların sayı 319 min 181-ə yüksəlib”.

    Ətraflı   16:56     29-Oct-2020     307
  • alternative title

    İsveçrədə son bir həftədə koronavirusa yoluxma sayı ikiqat artıb

    Son bir həftədə İsveçrədə koronavirusa yoluxma və ölüm halları ikiqat artıb. QALANEWS xəbər verir ki, ekspertlər infeksiyaya yoluxmanın bu sürətlə davam edəcəyi təqdirdə 10-14 gün sonra ölkədəki xəstəxanalarda reanimasiya şöbələrində boş çarpayı qalmayacağı barədə xəbərdarlıq ediblər. Gündəlik yoluxma sayının 8600 nəfərə çatması isə İsveçrə hökumətini yeni məhdudiyyətlər tətbiqinə vadar edib. Hökumətin qərarına əsasən, oktyabrın 29-dan etibarən ölkədə 50 nəfərdən artıq şəxsin iştirak etdiyi bütün tədbirlər qadağan olunur. Eyni zamanda, ictimai məkanlarda 15-dən artıq şəxsin bir araya gəlməsinə icazə verilmir. Ailə və dost çevrəsindəki yığıncaqlarda isə iştirakçı sayı 10 nəfərdən çox olmamalıdır. İdman və mədəniyyət tədbirlərində isə 50-dək şəxsin iştirakına icazə verilir. Kafe və restoranlar isə saat 23:00-a kimi xidmət edə biləcəklər. Yeni qaydalar qeyri-məhdud müddətə qəbul edilib. 8,6 milyon əhalisi olan İsveçrədə gündəlik yoluxma hallarının 6-8 min arasında olması bu ölkədə pandemiyanın nəzarətdən çıxacağı təhlükəsini yaradır. Bir ay öncə ölkədə virusa yoluxanların sayı gündəlik 700-800 nəfərə bərabər idisə, iki həftə sonra 3-4 minə, indi isə 8600 nəfərə çatıb. İndiyədək 135.658 nəfərin koronavirusa yoluxduğu bu ölkədə COVID-19-la əlaqədar 1954 ölüm halı qeydə alınıb.

    Ətraflı   16:54     29-Oct-2020     302
  • alternative title

    Ermənistanda koronavirusdan ölənlərin sayı kəskin artır

    Ermənistanda koronavirusdan ölənlərin sayında kəskin artım qeydə alınıb. Son sutka ərzində ölkədə daha 2 min 383 nəfərdə koronavirus təsdiqlənib, 29 nəfər isə pandemiyanın qurbanı olub. Bu barədə məlumatı Ermənistanın Səhiyyə Nazirliyinin Xəstəliklərə Nəzarət və Onların Profilaktikası Milli Mərkəzi yayıb. Bildirilir ki, bununla da Ermənistanda virusa yoluxanların ümumi sayı 85 034-ə, pandemiya qurbanlarının sayı isə 1272-ə çatıb. Hazırda Ermənistanda 28 min 548 aktiv koronavirus xəstəsinin olduğu bildirilir.

    Ətraflı   16:51     29-Oct-2020     1319
  • alternative title

    Gürcüstanda koronavirus yayılmaqda davam edir

    Gürcüstanda son sutka ərzində daha 1709 nəfərin koronavirusa yoluxduğu təsdiqlənib. Bu barədə Gürcüstan hökumətinin xüsusi rəsmi stopgov.ge saytında bildirilib. Qeyd olunur ki, son 24 saat ərzində 2075 nəfər sağalıb, 20 pasiyent ölüb. Bununla da ölkədə indiyədək COVID-19-a yoluxanların ümumi sayı 35 min 567-yə çatıb. Sağalanların sayı 16 min 907, pandemiya qurbanlarının sayı isə 273-dür. Hazırda ölkə üzrə karantində 3 min 324, stasionar nəzarətdə isə 4 min 209 nəfər saxlanılır. Xəstəliyi yüngül və ya simptomsuz keçirən 2 346 nəfər xüsusi otellərdə müalicə ilə təmin olunur.

    Ətraflı   16:50     29-Oct-2020     328
  • alternative title

    Qırğızıstanda koronavirusa yoluxanların sayı 58 minə çatıb

    Son gündə Qırğızıstanda COVID-19-a yoluxanların sayı 522, pandemiya dövründə isə 57 min 798 nəfərə çatıb. Qırğızıstan Səhiyyə Nazirliyi xəbər verir ki, son sutkada 460, ümumiyyətlə isə 49 min 97 xəstə sağalıb. Son 24 saat ərzində virusdan 1 nəfər həyatını itirib, ölənlərin sayı 1138 nəfərə çatıb. Stasionarda 3 min 444, ev şəraitində 3 min 580 xəstə müalicə olunur. Son sutkada 3, ümumiyyətlə isə 3 min 605 tibb işçisi COVID-19-a yoluxub.

    Ətraflı   16:48     29-Oct-2020     350
  • alternative title

    Koronavirus və “İspan qripi”nin ümumi xüsusiyyətləri açıqlanıb

    Koronavirus və “İspan qripi” pandemiyasına səbəb olan virusun yayılmasında oxşarlıqlar var. “RİA Novosti”nin məlumatına görə, bu barədə Rusiya Səhiyyə Nazirliyinin infeksion xəstəliklər üzrə baş mütəxəssisi, professor Vladimir Çulanov xəbər verib. “Hər ikisi hava-damcı yolu ilə ötürülən respirator infeksiyasıdır. Bu səbəbdən onların yayılmasında ortaq xüsusiyyətlər var”, - deyə o bildirib. Bununla belə həkim koronavirusun yoluxuculuğunun qrip virusundan daha yüksək olduğunu vurğulayıb. Qeyd edək ki, 1918-1920-ci illər arasında davam edən “İspan qripi” yoluxma halı və ölüm hadisələri baxımından ən geniş yayılmış qrip pandemiyası olub. Müxtəlif hesablamalara görə, “İspan qripi”ndən 100 milyona yaxın insan ölüb.

    Ətraflı   16:11     29-Oct-2020     1257
  • alternative title

    Azərbaycanda koronavirusa yoluxanların sayı 1000-i keçdi - FOTO

    Azərbaycanda koronavirusa (COVID-19) 1015 yeni yoluxma faktı qeydə alınıb, 483 nəfər müalicə olunaraq sağalıb və evə buraxılıb. Nazirlər Kabineti yanında operativ qərargahdan verilən məlumata görə, doqquz nəfər COVID-19-dan vəfat edib. Aktiv xəstə sayı 10636 nəfərdir. Ölkədə son sutka ərzində 11813, hazırkı dövrədək isə 1331287 test aparılıb. Ümumi ölənlərin sayı 708nəfərdir. Ümumi yoluxanların sayı 53152 nəfər, ümumi sağalanların sayı 42516 nəfərdir.

    Ətraflı   15:44     29-Oct-2020     1915
  • alternative title

    Ukraynada koronavirus həyəcanı: Qərərgaha Zelenski özü başçılıq edəcək

    Ukrayna Prezidenti Vladimir Zelenski ölkəsində COVID-19 pandemiyasına qarşı mübarizə qərargahına rəhbərlik edəcək. Bu barədə “RBC-Ukrayna” xəbər yayıb. Ölkədə koronavirus üçün kütləvi testlərin aparılması, laboratoriya potensialının artırılması və xəstəxanaların koronavirus müalicəsi şöbələrinə çevrilməsi təmin ediləcək. Pulsuz test və təcili yardım üçün simptomları olan və ya koronavirus xəstəliyindən əziyyət çəkən ukraynalılar üçün vahid Ukrayna çoxkanallı telefon xətti də tətbiq olunur. Ümumi gücü gündə 100 mindən çox tədqiqat aparacaq dövlət regional virusoloji laboratoriyalar şəbəkəsinin yaradılması nəzərdə tutulur. Xatırladaq ki, Ukraynadakı koronavirusa görə fövqəladə vəziyyət 31 dekabr 2020-ci il tarixinədək uzadılıb. Qeyd edək ki, Ukraynada 370 417 nəfərdə koronavirus müəyyən edilib.

    Ətraflı   15:38     29-Oct-2020     1463
  • alternative title

    Siyəzəndə koronavirusla bağlı polis reydi - FOTO

    Siyəzən Rayon Polis Şöbəsinin əməkdaşları tərəfindən koronavirusun (COVID-19) kütləvi yayılmasının qarşısının alınması məqsədilə gücləndirilmiş nəzarət profilaktik-maarifləndirmə tədbirləri davam etdirilir. Daxili işlər Nazirliyinin Mətbuat Xidmətinin Quba regional qrupundan verilən məlumata görə, şöbə əməkdaşları rayon ərazisindəki ticarət mərkəzlərində, aptek və fəaliyyətinə icazə verilən digər qapalı məkanlarda mütəmadi olaraq reydlər keçirir, tənəffüs yollarını qoruyan fərdi vasitələrdən istifadə etməyən şəxslərlə izahedici söhbətlər aparırlar. Bundan əlavə, insanların sıx toplaşdığı bank, poçt məntəqələrinin və digər idarələrin qarşısında xidmət aparan polis əməkdaşları sosial məsafəni gözlənilməsinə nəzarət etməklə yanaşı, sakinlərə tibbi maska paylayırlar. Həmçinin, RPŞ-nin DYP bölməsinin inspektorları sərnişindaşıma ilə məşğul olan nəqliyyat vasitələrinin sürücüləri ilə maarifləndirici söhbətlər apararaq, onlara marşrut avtobuslarında və taksilərdə tibbi maskadan istifadə edilməsinin vacibliyi barədə məlumatlar verirlər.

    Ətraflı   15:18     29-Oct-2020     357
  • alternative title

    Deputat: “Əgər vətəndaş lazımi məsuliyyət göstərmirsə, dövlətin tədbirlərinin o qədər də effekti olmayacaq”

    Hazırda dünya ölkələri koronavirus pandemiyasının yeni dalğasını yaşayır. Bir çox ölkədə virusun yayılmasının qarşısını almaq üçün ciddi tədbirlər həyata keçirilir. Bir sıra Avropa ölkələrində karantin rejimi yenidən sərtləşdirilib. Son günlər Azərbaycanda koronavirusa (COVID-19) yoluxanların sayında kəskin artım müşahidə edilir. Yoluxma və sağalma halları arasında fərq yüksəlir, sanitar-epidemoloji durum pisləşir. Ölkəmizdə bu xəstəlikdən ölənlərin sayı 699 nəfər, ümumi yoluxanların sayı 52137 nəfər, ümumi sağalanların sayı 42033 nəfər təşkil edir. Ölkədə son sutka ərzində 11426, hazırkı dövrədək isə 1319474 test aparılıb. Hazırda aktiv xəstə sayı 9405 nəfərdir. Ötən gün Azərbaycanda koronavirusa 988 yeni yoluxma faktı qeydə alınıb. Son günlər Azərbaycanda hərbi vəziyyətlə əlaqədar hər kəsin fikri müharibəyə yönəlib. Nəticədə, ikinci ciddi təhlükəyə səbəb olan koronavirus (COVID-19) yaddan çıxıb. Vətəndaşlar tərəfindən qoruyucu vasitələrdən istifadə səviyyəsi aşağıdır. Onlar sosial məsafə saxlamır, yoluxmanın qarşısının alınması üçün digər tövsiyələrə lazımınca riayət olunmur. Buna görə də koronavirusa gündəlik yoluxmaların sayında artım qeydə alınır. Ticarət, məişət-iaşə obyektlərində, ictimai nəqliyyatda təhlükəsizlik qaydalarına riayət olunması səviyyəsi qənaətbəxş deyil. Pandemiyanın qarşısının alınması məqsədi ilə Nazirlər Kabinetinin qərarına əsasən, ölkə ərazisində xüsusi karantin rejiminin müddəti 1 dekabr 2020-ci il saat 06:00-dək uzadılıb. Eyni zamanda, son günlər Lənkəran şəhərində, Cəlilabad və Masallı rayonlarında yüksək yoluxma faktları aşkar olunduğuna görə, həmin rayonlara giriş-çıxış dayandırılıb. Məsələ ilə bağlı Milli Məclisin Əmək və sosial siyasət komitəsinin iclasında komitə sədri Musa Quliyev bildirib ki, bir ilə yaxındır ki, koronavirus bütün dünyanın probleminə çevrilib: “Nəticədə ciddi tibbi-sosial, siyasi iqtisadi çətinliklər yaranıb. Azərbaycan COVID-19-la mübarizədə ən öndə gedən nümunəvi ölkələrdən biridir. Bu xəstəlik yayılmağa başladığı ilk gündən dövlət səviyyəsində bütün işlər görülür. Biz yaz-yay dövründə COVID-19-la uğurlu mübarizə apardıq, yoluxanların sayını lokallaşdıra bildik. Görülən tədbirlər nəticəsində eyni vaxtda 8000-ə yaxın xəstəni müalicə etmək imkanımız var. Bu virusun qarşısının alınması üçün dövlətin gördüyü tədbirlərə əhali mütləq dəstək verməlidir”. M.Quliyev bildirib ki, koronavirusla mübarizədə vətəndaşların maarifləndirilməsinə ehtiyac var: “Əhali istənilən bir soyuqdəymə əlaməti olanda, yaxud əzginlik, narahatlıq, boğaz ağrısı, temperaturu olanda həkimlərə müaciət etsinlər. Əgər vətəndaş lazımi məsuliyyət göstərmirsə, dövlətin tədbirlərinin o qədər də effekti olmayacaq. Bu mübarizədə əhalidən ciddi nəsə tələb olunmur. Sadəcə - sosial məsafə saxlamaq, maska taxmaq, ehtiyac olmayanda evdən çıxmamaq və dizenfeksiya məhsullarından istifadə etmək lazımdır”. “Koronavirusa yoluxma sayı artarsa, karantin tədbirləri ilə bağlı daha da ciddi tədbirlərin görülməsinə ehtiyac yarana bilər. Ola bilsin yenə insanlar SMS icazə ilə yaşadığı yeri tərk etsin, 65 yaşdan yuxarı şəxslərin evdən çıxmasına qadağa qoyulsun. Təbii ki, bunlar Nazirlər Kabineti yanında operativ qərargahın verəcəyi qərardır. İnsanlar heç vaxt özünü müalicə ilə məşğul olmamalıdır. Bildiyiniz kimi epidemiya artan ərazilərdə gediş-gəliş bağlanıb. Eyni zamanda, yoluxmaların əksəriyyəti yas yerlərində olur. İnsanlar sosial məsafəni qorumurlar. Əgər vətəndaşımız intizamlı olarsa, bu xəstəliyə qalib gələ bilərik”. Hazırkı durum onu deməyə əsas verir ki, qarşıdan gələn dövrdə xüsusi karantin rejimi daha da sərtləşdirilə, yoluxma hallarının geniş yayıldığı şəhər və rayonlarla bağlı yeni məhdudiyyətlər tətbiq oluna bilər. Koronavirusla mübarizədə fəal olmaq, xüsusi karantin rejiminin qaydalarına riayət etmək həm də cəbhədə döyüşən əsgərlərimizin sağlamlığı üçün vacibdir. Bu gün orduya dəstək vermək istəyən hər bir vətəndaş ilk növbədə əsgər və zabitlərimizin sağlamlığı haqqında düşünməli, özünü və yaxınlarını xəstəlikdən qorumaqla haqq işimizə layiqli töhfəsini verməlidir. Bütün bunları nəzərə alaraq hamı xüsusi karantin rejiminin qaydalarına riayət etməli, maska taxmalı, şəxsi gigiyenasını gözləməlidir. Hər bir vətəndaş olduğu yerdən asılı olmayaraq, həm özünə, həm də ətrafına qarşı diqqətli olmalı, nümunə göstərməli, qaydaların pozulmasına dözümsüzlük nümayiş etdirməlidir.

    Ətraflı   12:48     29-Oct-2020     1320
  • alternative title

    Dieqo Maradona karantinə alınıb

    Argentinalı futbol əfsanəsi Dieqo Maradona koronavirus simptomları olan bir nəfərlə təmasda olduğu üçün karantinə alınıb. Argentinanın “Ximnasiya” klubunu çalışdıran mütəxəssis COVID-19 testi verəcək. “Ximnasiya”nın “Patronato” ilə oynayacağı matçda komandanın başında olması gözlənməyən Maradona iki gün sonra 60 yaşını qeyd edəcək.

    Ətraflı   12:03     29-Oct-2020     355
  • alternative title

    Koronavirusla bağlı SON STATİSTİKA

    Dünyada 44 774 763 nəfərdə koronavirus aşkarlanıb. QALANEWS xəbər verir ki,virusdan 1 179 225 xəstə ölüb, 32 727 598 nəfər sağalıb. Asiyada 13 409 096, Şimali Amerikada 10 916 519, Cənubi Amerikada 9 523 740, Avropada 9 127 677, Afrikada isə 1 759 578 nəfərdə virus aşkarlanıb. Virusa yoluxma sayı bir milyonu keçən dövlətlər ABŞ (9 038 030 nəfər), Hindistan (7 990 322 nəfər), Braziliya (5 440 903 nəfər), Rusiya (1 547 774 nəfər), Fransa (1 198 695 nəfər), İspaniya (1 174 916 nəfər), Argentina (1 116 609 nəfər) və Kolumbiyadır (1 033 218 nəfər). İranda 588 648, Türkiyədə 368 513, Ermənistanda 82 651, Gürcüstanda isə 33 858 nəfərdə koronavirus müəyyən edilib. Azərbaycanda koronavirusa yoluxan 52 137 nəfərin 699-u ölüb, 42 033-ü sağalıb.

    Ətraflı   10:43     29-Oct-2020     1058
  • alternative title

    Fransada koronavirusa görə ümummilli karantin elan edildi

    Fransada oktyabrın 30-dan dekabrın 1-dək ümummilli karantin elan edilib. “RİA Novosti”nin məlumatına görə, bu barədə Fransa Prezidenti Emmanuel Makron bildirib. “Mən qərara gəldim ki, cümə günündən etibarən virusun yayılmasını dayandırmaq üçün karantin tətbiq etmək lazımdır”, - deyə E.Makron bildirib. Xatırladaq ki, ölkədə ümumilikdə koronavirusa 1 279 384 yoluxma qeydə alınıb.

    Ətraflı   10:35     29-Oct-2020     1720
  • alternative title

    İtaliyada koronavirusa rekord yoluxma qeydə alındı

    İtaliyada son sutka ərzində koronavirusa yeni yoluxma hallarında rekord qeydə alınıb. Bu barədə “İnterfaks” məlumat yayıb. Ölkədə son sutkada 24991 yeni yoluxma aşkarlanıb. Sutka ərzində ölənlərin sayı isə 205-ə bərabər olub. Xatırladaq ki, İtaliyada ümumi yoluxma sayı 589766, sağalanların 275404, ölənlərin sayı isə 37905-dir.

    Ətraflı   10:17     29-Oct-2020     328
  • alternative title

    Eyni vaxtda koronavirus və qripə yoluxmanın ölümcül təhlükəsi açıqlandı

    Koronavirusdan ölüm hadisələri arasında qripin ağırlaşdırdığı hallar da ola bilər. “Sputnik”in məlumatına görə, bu barədə Rusiya Elmlər Akademiyasının akademiki, virusoloq, Meçnikov adına Vaksin və Zərdablar Elmi Tədqiqat İnstitutunun direktoru Vitali Zverev xəbər verib. Mütəxəssisin sözlərinə görə, COVID-19 pandemiyası fonunda bir çoxları qripdən çəkinməyi dayandırıb, halbuki bu xəstəlik heç də koronavirusdan az təhlükəli deyil. Belə ki, sözügedən respirator xəstəliyindən ölüm halları dünyada ən yüksək göstəricilərə malikdir. “Məsələn, ABŞ-da mövsümi qrip epidemiyası dövründə 30-40 min insan vəfat edir. Diabet xəstələri, ürək-damar xəstəlikləri və böyrək problemi olanlar isə xüsusi risk qrupundadır. COVID-19-la eyni vaxtda qripə yoluxmaq pasiyentin vəziyyətini lap ağırlaşdıra bilər”, - deyə o, vurğulayıb. Zverev ehtimal edir ki, qrip ağırlaşmalarına görə koronavirusdan ölən xəstələr az olmayıb. Lakin təsdiqlənmiş COVID-19 diaqnozunda həkimlər xəstəni qriplə əlaqədar müayinə etmirlər, laboratoriya diaqnozları qoyulmadığı üçün də bu barədə dəqiq heç nə deyilmir. “Ola bilməz ki, bir il ərzində qrip hadisəsi qeydə alınmasın”, - deyə həkim əlavə edib. Bununla birlikdə, o, bu il qrip infeksiyasına yoluxma halının ötən illərə nisbətən daha az olacağına inandığını deyib: “Adətən qrip epidemiyası şərqdən gəlir. İndi isə sərhədlər bağlıdır”. Həkimin sözlərinə görə, qrip COVID-19 kimi asemptomatik olmadığı üçün insanın dərhal xəstə olduğunu anlayır, özünü təcrid edir və daha az insana yoluxdurur. Zverev son olaraq COVID-19 və qripdən ən yaxşı müdafiə vasitəsinin vaksinasiya olduğunu vurğulayıb.

    Ətraflı   10:08     29-Oct-2020     1403

Weather icon

humidity: 10%







Sosİal medİa

FACEBOOK-DA BİZƏ QOŞULUN

@qalanews

ŞAHİDİ OLDUĞUNUZ HADİSƏLƏRİ ÇƏKİB BİZİMLƏ PAYLAŞIN

BİZİ TWITTER-DƏ İZLƏYİN

@qalanews

BİZİ INSTAGRAM-DA İZLƏYİN

@qalanews

BİZİ YOUTUBE-DA İZLƏYİN

@qalanews

Hadİsə

  • alternative title 10:51     29-Oct-2020     534
  • alternative title 10:47     29-Oct-2020     1390
  • alternative title 11:16     28-Oct-2020     1726
  • alternative title 10:56     28-Oct-2020     526
  • alternative title 12:40     27-Oct-2020     1611
image title here

Some title